Akademija navuk: žorstkija reformy pavialičać zarobak u krainie da 2020 hoda da $1075

Nacyjanalnaja Akademija navuk padrychtavała prahnoz ekanamičnaha raźvićcia Biełarusi da 2030 hoda. U stvareńni dakumienta pryniali ŭdzieł try navukovyja instytuty, a taksama viadučyja ŭniviersitety – BDU i BDEU. Kniha vydadzienaja pad redakcyjaj staršyni prezidyuma Akademii navuk Uładzimira Husakova.

Daśledčyki adznačajuć, što praź niekalki hadoŭ pačniecca novy padjom suśvietnaj ekanomiki. «U 2018–2040 klučavuju rolu dla kankurentazdolnaści budzie hrać technałohii šostaha technałahičnaha ŭkładu, pierachod da jakoha ŭ Biełarusi tolki pačynajecca», – pišuć aŭtary prahnoza.

Havorka viadziecca pra nanatechnałohii. Kab nablizić Biełaruś da suśvietnych tendencyj, patrebnyja strukturnyja reformy ekanomiki. Resursy musiać być skancentravanyja na tych nakirunkach, jakija daduć efiekt u siarednie- i dalokaterminovaj pierśpiektyvie.

Navukoŭcy razhledzieli try scenary raźvićcia ekanomiki.

Žorstkija reformy praduhledžvajuć, što inviestycyjna-finansavyja płyni buduć štohod pieraraźmiarkoŭvacca miž halinami ekanomiki na 10%.

Realizacyja hetaha radykalnaha varyjantu daść chutki efiekt. Užo da 2020 hoda siaredni zarobak vyraście da $1075. Adnak u nastupnyja hady, kali daviadziecca adnaŭlać bałansy ŭ ekanomicy, zarobak skarocicca da $923.

Ekanamisty bačać u hetym varyjancie pahrozy dla biełaruskaj madeli. «Asnoŭnymi donarami strukturnaj pierabudovy pa «žorstkim» scenary buduć vystupać chatnija haspadarki, što niedapuščalna ŭ ramkach sacyjalna-aryjentavanaj ekanomiki. [Scenar] vykliča rezki rost biespracoŭja ŭ nizkarentabielnych pradpryjemstvach i razryŭ kaapieracyjnych suviaziaŭ unutry halinaŭ», – adznačajecca ŭ prahnozie.

Nastupny varyjant – miakkija reformy. U takim vypadku štohod budzie pieraraźmiarkoŭvacca 5% inviestycyjna-finansavych płyniaŭ. Čakajecca, što siaredni zarobak da 2020 hoda vyraście da $1050, paśla rost zamarozicca, a ŭ 2030 hodzie dasiahnie $1124.

Narešcie, pry «pasiŭnym scenary» reformy buduć zapavolenyja ci ŭvohule nie buduć pravodzicca. Śpiecyjalizacyja vytvorčaści i dysbałansy ŭ haspadarcy zastanucca raniejšymi. Ale zarobki ŭsio adno vyrastuć – da $1007 u 2020 hodzie.

Pra admovu ad «inflacyjnaj» madeli raźvićcia ekanomiki razmova nie viadziecca. Tamu devalvacyj paźbiehnuć nie ŭdasca.

«Abjom VUP u ciakučych cenach u 2030 hodzie pavialičycca ŭ 4,5-5 razu. Naturalna, hetyja źmieny buduć supravadžacca nieabchodnaściu karekciroŭki kursa i, mahčyma, u razy. Pryčyna – u nazapašanych unutranych dysbałansach i paharšeńni mižnarodnaj inviestycyjnaj pazicyi (admoŭny bałans pieravyšaje $40 miljardaŭ)», – adznačajecca ŭ prahnozie.

Daśledčyki bačać vialikuju vierahodnaść cisku zališkavaj hrašovaj masy na ekanomiku. Kryzisnyja piki čakajucca ŭ 2024 i 2027 hadach.

• 0
• 0
• 0
• 0
• 0
• 0
• 0
• 0