Unian.net
Pa słovach daradcy kiraŭnika MUS Ukrainy Antona Hieraščanki, zabojstva adbyłosia na vulicy Dziehciaroŭskaj.
Žurnalista — ukrainskaja presa nazyvaje jaho sumnaviadomym — rasstralali z aŭtamabila Ford Focus ciomna-siniaha koleru ź litoŭskimi numarami.
Na miescy zdareńnia pracuje śledča-apieratyŭnaja hrupa.
«Padobna na toje, što adstreł śviedak pa spravie Antymajdanu praciahvajecca. Usim, chto mieŭ dačynieńnie da arhanizacyi i finansavańnia Antymajdanu abo inšych supraćpraŭnych dziejańniaŭ suprać Majdanu i adčuvaje pahrozu žyćcia, prośba źviartacca ŭ pravaachoŭnyja orhany, kab nie pajści ŭśled za Kałašnikavym [były adyjozny deputat ad Partyi rehijonaŭ, zabity ŭčora — NN] i Buzinoj», — napisaŭ u Facebook Hieraščanka.
Aleś Buzina byŭ hałoŭnym redaktaram haziety «Siehodnia», potym pracavaŭ u haziecie «Viesti».
Pucin padčas pramoha teleefiru ŭžo paśpieŭ nazvać zabojstva Buziny palityčnym.
Aleś Buzina naradziŭsia i vyras u Kijevie, vučyŭsia ŭ Kijeŭskim nacyjanalnym univiersitecie imia Tarasa Šaŭčenki pa śpiecyjalnaści «vykładčyk ruskaj movy i litaratury».
Adnak pa śpiecyjalnaści nie pracavaŭ, a pryśviaciŭ siabie žurnalistycy. Pracavaŭ u roznych kijeŭskich vydańniach, apošniaje ź ich - hazieta «Viesti», da hetaha niadoŭhi čas byŭ hałoŭnym redaktaram haziety «Siehodnia», jakaja vychodzić na ruskaj movie
Akramia hetaha, na praciahu niekalkich hadoŭ vioŭ telepieradaču na kanale «Inter».
Aleś Buzina padtrymlivaŭ tak zvanuju fiederalizacyju Ukrainy (mienavita hetaje patrabavańnie hod tamu na ŭschodzie Ukrainy vyłučali praciŭniki novych kijeŭskich uładaŭ).
Vystupaŭ za adzinstva słavianskich narodaŭ — i na hetaj padstavie nazyvaŭ siabie adnačasova ukraincam i ruskim.
Jamu było 45 hadoŭ. U jaho zastalisia žonka i dačka.
Dniom raniej u Kijevie byŭ zabity były deputat Viarchoŭnaj Rady ad Partyi rehijonaŭ Aleh Kałašnikaŭ.
Palityčnyja apanienty Kałašnikava śćviardžali, što jon byŭ datyčny da finansavańnia ruchu «Antymajdan», jaki ŭ razhar antyŭradavych vystupaŭ listapad 2013 — luty 2014 h. padtrymlivaŭ eks-prezidenta Janukoviča.
Kamientary