Kalakin: My nie možam padpisacca pad praceduraj vyłučeńnia kandydataŭ kanhresa demakratyčnych sił praz zbor podpisaŭ

Lidar Biełaruskaj partyi levych «Spraviadlivy śviet» Siarhiej Kalakin «ździŭleny» padpisańniem 17 listapada piaćciu apazicyjnymi strukturami pahadnieńnia ab pracedury abrańnia adzinaha kandydata ad demakratyčnych sił na prezidenckich vybarach 2015 hoda.

Pahadnieńnie padpisali Biełaruskaja sacyjał-demakratyčnaja partyja (Hramada), ruch «Za Svabodu», kampanija «Havary praŭdu», Partyja BNF i arhkamitet pa stvareńni partyi «Biełaruskaja chryścijanskaja demakratyja» (BCHD). Tym časam pieramovy pra abrańnie adzinaha kandydata ad demsił na majučych adbycca vybarach viali siem apazicyjnych struktur: akramia piaci nazvanych arhanizacyj, heta Biełaruskaja partyja levych «Spraviadlivy śviet» i Abjadnanaja hramadzianskaja partyja (AHP).

«Ja prysutničaŭ na siońniašniaj sustrečy «siamiorki». Tam nijakaha pahadnieńnia pry mnie nie padpisvałasia. Mahčyma, jany prosta pastavili podpisy pad praceduraj, jakaja ŭzhadniałasia ŭžo na praciahu siami miesiacaŭ»,

— skazaŭ Kalakin.

Pavodle jaho słoŭ, «užo daŭno było viadoma, što piać struktur padtrymlivajuć praceduru vyłučeńnia adzinaha kandydata, pad jakoj jany padpisalisia».

«Ale my nie možam padpisacca pad praceduraj vyłučeńnia kandydataŭ kanhresa demakratyčnych sił praz zbor podpisaŭ. Heta forma vyłučeńnia nie vyklikaje davieru. My pamiatajem situacyju 2010 hoda, kali šmatlikija kandydaty ŭ prezidenty nasamreč nie sabrali podpisy, ale byli zarehistravanyja Centrvybarkamam. Tamu my nie ličym, što praz zbor podpisaŭ možna vyłučać delehataŭ kanhresa»,

— zajaviŭ lidar partyi.

«U nas jość adpaviednaje partyjnaje rašeńnie. Chutka ŭ nas budzie pasiadžeńnie kiraŭničaha orhana, my jašče raz razhledzim heta pytańnie», — dadaŭ jon.

Pavodle jaho słoŭ, kali piaciorka arhanizacyj sapraŭdy padpisała niejkaje pahadnieńnie, to «heta nieparazumieńnie i nie vielmi pravilny krok». «Kali pahadnieńnie było padpisana piaćciu strukturami, značyć, jany iduć na vybary ŭ kaalicyi «Narodny refierendum» (u jaje ŭvachodziać čatyry struktury, jakija padpisali siońnia pahadnieńnie akramia arhkamiteta BCHD. — BiełaPAN.) Ale heta nie budzie mieć nijakaha dačynieńnia da abrańnia adzinaha kandydata, a naadvarot, budzie tarmazić mahčymaść jaho vyłučeńnia», — ličyć Kalakin.

U cełym ža, pavodle jaho mierkavańnia, «ničoha novaha siońnia nie adbyłosia». «Kali jany žadajuć, kab byŭ nie adziny kandydat, a kandydat ad «Narodnaha refierendumu», tady ŭsio zrazumieła z hetym rašeńniem. Ale jašče siońnia ranicaj jany kazali pra nieabchodnaść adzinaha kandydata, a nie kandydata ad «Narodnaha refierendumu», — zaŭvažyŭ Kalakin.

Nahadajem, anałahičnym čynam prakamientavaŭ siońniašniuju padzieju i staršynia AHP Anatol Labiedźka. Pavodle jaho słoŭ, na siońnia možna havaryć, chutčej, pra vyłučeńnie adzinaha kandydata nie ad demakratyčnych sił, a ad kampanii «Narodny refierendum».

• 0
• 0
• 0
• 0
• 0
• 0
• 0
• 0