Lidary mahiloŭskich prafsajuzaŭ chočuć padać u sud na telekanały «RTR-Biełaruś» i «NTV-Biełaruś»
Lidary mahiloŭskich arhanizacyj niezaležnych prafsajuzaŭ zajavili pra namier padać u sud za ekstremizm na telekanały «RTR-Biełaruś» i «NTV-Biełaruś».
Nahadajem, u lipieni mahiloŭskija aktyvisty niezaležnych prafsajuzaŭ i hramadskaha abjadnańnia «Fond imia Lva Sapiehi» źviarnulisia ŭ Ministerstva suviazi ź infarmatyzacyi, Biełteleradyjokampaniju i Hienieralnuju prakuraturu z prośbaj zamianić rasijskija telekanały RTR i NTV na ŭkrainski i kazachstanski, jakija taksama viaščajuć na ruskaj movie. Svaju prośbu jany rastłumačyli tym, što, na ich dumku, na rasijskich telekanałach raspaŭsiudžvajecca «antyŭkrainskaja isteryja, nakiravanaja na raspalvańnie mižnacyjanalnaj varožaści i sieparatyzmu».
U atrymanym aktyvistami adkazie, padpisanym namieśnikam ministra infarmacyi Siarhiejem Chilmanam, adznačajecca: «Usie vosiem teleprahram, što raspaŭsiudžvajucca na terytoryi Mahilova ŭ ahulnadastupnym ličbavym efirnym pakiecie, źjaŭlajucca srodkami masavaj infarmacyi, zarehistravanymi na terytoryi Respubliki Biełaruś. Infarmacyja ab raspaŭsiudžvańni ŭ hetym ličbavym pakiecie teleprahram, zarehistravanych na terytoryi Rasijskaj Fiederacyi, nie adpaviadaje rečaisnaści».
Akramia taho, u liście ŭkazana, što tolki sud moža pryznavać materyjały ekstremisckimi. «U vypadku kali rašeńniem suda budzie pryznana, što redakcyja teleprahramy raspaŭsiudžvaje ekstremisckija materyjały, hetaja redakcyja budzie nieści adkaznaść u adpaviednaści z zakanadaŭstvam», — adznačyŭ Chilman.
«Cikava, što navat pytańnie raspačynańnia kryminalnaj spravy pa raspalvańni rasavaj, nacyjanalnaj abo relihijnaj varožaści Hienieralnaja prakuratura addała vyrašać Ministerstvu infarmacyi. Usie adrasaty praihnaravali zvarot, nie razhledzieli jaho pa sutnaści i pierasłali ŭ Ministerstva infarmacyi», — zajaviŭ u kamientary BiełaPAN adzin z padpisantaŭ zvarotu Juryj Novikaŭ, jaki pradstaŭlaje abłasnuju arhanizacyju Svabodnaha prafsajuza Biełaruskaha.
Novikaŭ i inšyja padpisanty zvarotu — Juryj Darašenka sa Svabodnaha prafsajuza mietalistaŭ, Alaksiej Jaŭhienaŭ z prafsajuza REP i Uładzimir Šancaŭ z Fondu imia Lva Sapiehi — zajavili pra namier padrychtavać sudovyja iski na telekanały «RTR-Biełaruś» i «NTV-Biełaruś».
Ciapier čytajuć
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty17
Kamientary