Paśla prybyćcia kožny ź ich budzie pad nahladam lekaraŭ 21 dzień.
Try tydni — maksimalny intervał pamiž infikavańniem i prajavaj simptomaŭ lichamanki Eboła. Kab papiaredzić jaje ŭvoz u krainu, Ministerstva achovy zdaroŭja rekamiendavała ŭstanovam adukacyi, achovy zdaroŭja i sanepidsłužby vieści ŭlik zamiežnych studentaŭ ź niebiaśpiečnych rehijonaŭ.
U Homieli ŭ śpis trapili 29 afrykancaŭ, jakija navučajucca ŭ miedycynskim univiersitecie.
«Ź Nihieryi ŭ vieraśni pryjeduć pieršakurśniki, z kanikuł viernucca studenty starejšych kursaŭ», — raspaviała dekan fakulteta pa padrychtoŭcy śpiecyjalistaŭ dla zamiežnych krain miedycynskaha univiersiteta Śviatłana Choduleva.
Pieršuju pilnuju ŭvahu da siabie budučyja miedyki adčujuć na aŭtadarožnych punktach propusku i ŭ aeraportach. Užo tam epidemijołahi pahutarać ź imi, źbiaruć anamniez, pamierajuć tempieraturu. Kali ništo nie vykliča padazreńni, anałahičnyja dziejańni zrobiać lekary ŭ haradskich paliklinikach. Jany buduć štodnia ahladać studentaŭ sa śpisu na praciahu 21 dnia.
«Pa našych źviestkach, usio nihieryjcy prybuduć u Homiel da 10 vieraśnia. Da kastryčnika budziem dakładna viedać, ci jość siarod ich nośbity virusa Eboła, — adznačaje hałoŭny dziaržaŭny sanitarny ŭrač Homielskaj vobłaści Alaksandr Tarasienka. — Pry padazreńni na zachvorvańnie studenty buduć špitalizavany ŭ infiekcyjnuju balnicu».
U liku asnoŭnych simptomaŭ lichamanki Eboła Suśvietnaja arhanizacyja achovy zdaroŭja nazyvaje vysokuju tempieraturu, słabaść, ciahlicavyja boli, hałaŭny bol i bol u horle. Za imi iduć vanity, dyjareja, syp, parušeńnie funkcyj nyrak i piečani, u niekatorych vypadkach unutranyja i źniešnija kryvacioki.
Jak zajaviła namieśnik načalnika adździeła hihijeny, epidemijałohii i prafiłaktyki Ministerstva achovy zdaroŭja Ina Karaban, u Biełarusi pahrozy epidemijałahičnaj situacyi ŭ suviazi z uspyškaj lichamanki Eboła ŭ Zachodniaj Afrycy nie nazirajecca. Razam z tym budzie nie lišnim pamiatać, što ad čałavieka čałavieku virus pieradajecca pry ciesnym kantakcie z usimi bijałahičnymi vadkaściami. Kali nie dakranacca da chvoraha, zarazicca niemahčyma. Maksimalnaj ryzycy padviarhajucca tyja, chto vyjazdžaje ŭ pryrodnyja ačahi zaražeńnia.
Kamientary