Niamieččyna — čempijon!

Tolki ŭ dadatkovy čas vyjaviŭsia pieramožca čempijanatu śvietu pa futbole.

Paśla taho halavoha karnavału, što zładzili niemcy ŭ paŭfinale z Brazilijaj, ad Bundesmanšaft čakali vielmi mnohaha. Navat bukmiekiery rabili jeŭrapiejcaŭ biezumoŭnymi favarytami finału. Adnak jość takoje praviła, što na amierykanskim macieryku pieramahajuć tolki miascovyja kamandy. Darečy, miarkujučy pa hule trybun, možna było zrabić vysnovu, što brazilcy zaŭzialisia ŭsio ž za svaich kryŭdzicielaŭ niemcaŭ, a nie za adviečnych vorahaŭ arhiencincaŭ.

Arhiencina na hetym čempijanacie zusim nie fiejeryć. Niekatoryja navat kazali, što kamanda demanstravała nudny futboł. Hramatnaja hulnia ŭ abaronie staviłasia asnoŭnym dasiahnieńnie arhiencincaŭ. Nu, a ŭ napadzieńni, majučy takich majstroŭ, jak Miesi, Ahuera, Ihuain, choć paru šancaŭ dy ŭźniknie. Hałoŭnaje — ich realizacyja.

U pačatku hulni niemcy čakana zavałodali terytaryjalnaj pieravahaj. Šmat atakavali, ale ničoha vycisnuć z hetych atak nie mahli. Brakavała niejkaha kreatyŭnaha centra, jaki b zmoh upryhožyć hulniu niečakanaj pieradačaj ci niešabłonnym dziejańniem. Ataki niemcaŭ byli zanadta akademičnymi, pradkazalnymi dla abarony supiernika. Spadzievy zastavalisia na standarty. Paśla adnaho z kutavych miač trapiŭ u štanhu varot Arhienciny, ale heta chutčej vyniatak.

Mahčyma, niemcam brakavała traŭmavanaha napiaredadni hulni Sami Chiedziry (chaj Navicki niaspynna paŭtaraŭ jahonaje proźvišča, błytajučy z Aziłam).

A voś kontrataki Arhienciny byli navat bolš niebiaśpiečnyja za manatonnaje niamieckaje nastupleńnie. Paŭdniovaamierykanskaja spružyna vydatna raściskałasia, kali kamanda pačynała vałodać miačom. Asabliva charakternaj možna ličyć ataku, kali sa stanovišča pa-za hulnioj zabivaŭ Ihuain. Ataka była prosta šykoŭnaj, biada što napadnik na paru santymietraŭ zabieh u afsajd.

Pierad druhim tajmam byli mierkavańni, što arhiencincy mohuć padsieści fizična (maŭlaŭ, u ich było na dzień mienš adpačynku dyj hulnia z Hałandyjaj była kudy bolš stamlalnaj za lohkuju prahułku niemcaŭ). I dzie tam! Futboł nie staić na miescy, nie stajać na miescy i fizijaterapieŭty kamand. Arhiencincy byli ŭ dobraj formie i druhi tajm, i oviertajm.

U druhoj pałovie hulni futboł atrymaŭsia bolš cikavym. Realnyja momanty ŭpuskali abiedźvie kamandy. To Nojer vyratuje paśla solnaha prachoda Miesi, to Miesut Aził nie zdoleje jak śled udaryć pa miačy.

Usio vyrašyłasia za piać chvilin da skančeńnia dadatkovaha času. Pieramohu Hiermanii prynieśli reziervisty. Kros zadziejničaŭ Šurle, a Marya Hiotce adhuknuŭsia na jahonuju pieradaču.

Zbornaja Hiermanii stała čatyrochrazovym čempijonam śvietu! I nazvać hetuju pieramohu vypadkovaj nie vypadaje. Zvyštalenavitaje niamieckaje pakaleńnie narešcie dasiahaje vyšejšaha radka. Da hetaha ŭ ich było pa finale na Jeŭra-2008, a taksama try paŭfinały na top-spabornictvach. Hiermanija sapraŭdy była najlepšaj u Brazilii.

• 0
• 0
• 0
• 0
• 0
• 0
• 0
• 0