Ministerstva ŭnutranych spraŭ Biełarusi inicyiruje ŭniasieńnie dapaŭnieńniaŭ u Kodeks Respubliki Biełaruś ab administracyjnych pravaparušeńniach (KoAP), što praduhledžvajuć pryciahnieńnie pracaŭładkavanych abaviazanych asob, jakija ŭčyniajuć prahuły, da administracyjnaha aryštu.
Ab hetym siońnia paviedamiŭ načalnik adździeła arhanizacyi raboty inśpiekcyj pa spravach niepaŭnaletnich hałoŭnaha ŭpraŭleńnia achovy pravaparadku i prafiłaktyki MUS Vital Jančyn u čas anłajn-kanfierencyi na sajcie BIEŁTA na temu «Jak abaraniajucca pravy dziciaci ŭ Biełarusi».
Pradstaŭnik MUS rastłumačyŭ, što majecca na ŭvazie administracyjny aryšt z abaviazkovym pryciahnieńniem da pracy. «Ciapier takaja miera prymianiajecca tolki da asob, jakija ŭchilajucca ad pracaŭładkavańnia, ale nie ad pracy», — źviarnuŭ uvahu Vital Jančyn.
«Prablema niežadańnia abaviazanych asob pracavać pa-raniejšamu isnuje. U bolšaści svajoj heta asoby, jakija złoŭžyvajuć śpirtnymi napitkami i, jak praviła, pazbaŭlenyja baćkoŭskich pravoŭ. Dziakujučy sumiesnym namahańniam zacikaŭlenych dziaržorhanaŭ amal 99 pracentaŭ abaviazanych asob, jakija znachodziacca na ŭliku ŭ orhanach unutranych spraŭ, pracaŭładkavany, adnak amal 15 pracentaŭ ź ich uchilajucca ad pracy. Raniej hety pracent byŭ jašče bolšy — bolš jak 20 pracentaŭ», — dadaŭ jon.
Uzhodnieny z usimi zacikaŭlenymi viedamstvami prajekt zakona «Ab uniasieńni dapaŭnieńniaŭ i źmianieńniaŭ u Kryminalny, Kryminalna-pracesualny, Kryminalna-vykanaŭčy kodeksy Respubliki Biełaruś i Kodeks Respubliki Biełaruś ab administracyjnych pravaparušeńniach» užo znachodzicca ŭ Pałacie pradstaŭnikoŭ Nacyjanalnaha schodu.
Kamientary