Paśla hrandyjoznaha pośpiechu ČS-2014, spadziajusia, nazaŭždy spyniacca razmovy ab tym, navošta nam čempijanat śvietu ŭ alimpijski hod. Usio heta vydatna — rekordy naviedvalnaści, siensacyjnyja vyniki, zvyšlimitavyja telerejtynhi. Ale jość niekatoryja momanty, jakija zamaŭčać nie maju prava.
Kali prezident Biełarusi Alaksandr Łukašenka na cyrymonii adkryćcia ČS-2014 zajaviŭ, što heta suśvietnaje pieršynstvo stanie lepšym u historyi, u hłybini dušy ja skieptyčna ŭśmichnuŭsia: «Nu-nu… Tolki dzie vy nabiarecie ŭ adnym horadzie zaŭziataraŭ dla 56 matčaŭ papiaredniaha etapu, dy jašče na postalimpijskim turniry, kudy viazuć ekśpierymientalnyja składy?»
Pryznaju, darma sumniavaŭsia. Napieradzie płej-of, a sumarnaja aŭdytoryja ŭžo pieramachnuła za paŭmiljona — 536518 čałaviek. Da rekorda češskaha ČS-2004 — 552 097 hledačoŭ — rukoj padać. Minsk napeŭna skaryć ličbu 600 tysiač!
Biełarusy — dobry, sumlenny, haścinny narod. Čempijanat śvietu — pieršaje pa-sapraŭdnamu prestyžnaje, raskručanaje, z hłybokimi tradycyjami płanietarnaje hała-pradstaŭleńnie ŭ hetaj krainie. Pra što kazać, kali ČS-2014 tranślujuć u 150 krainach! Kali naš Pieršy kanał, u jakoha sport vidavočna nie na pieršych rolach, pakazvaje ŭ žyvym efiry čverćfinał Rasija — Francyja. Na TB razumiejuć: chakiej ciapier pa rejtynhu pabje luby sieryjał abo tok-šou.
Pamiataju, jak biełaruskija žurnalisty na ČS-2009 u Biernie niervavalisia pierad vybarami stalicy ČS-2014 i jak jany radavalisia, kali vyjhraŭ Minsk: «Narešcie my pakažam našu Biełaruś śvietu» I, sapraŭdy, arhanizatary litaralna ścielucca pierad haściami. Tym bolš stalicy jość čym hanarycca i navat vychvalacca. Z kim ciapier nie pahavaru, usio ŭ zachapleńni: čyścinia, pryhožyja budynki, masa parkaŭ, šyrokija praśpiekty, idealny hramadski transpart…
I jakim ža dysanansam na hetym fonie ŭčora prahučała viestka pra hibiel finskaha zaŭziatara. Trup mužčyny 1961 h.n. biez bačnych prykmiet hvałtoŭnaj śmierci i cialesnych paškodžańniaŭ znajšli na zdymnaj kvatery ŭ Minsku. Heta ŭžo druhi taki vypadak pa chodzie ČS. U noč z 11 na 12 maja ŭ pryharadnaj haścinicy pamior zaŭziatar z Łatvii, taksama 1961 h.n.
My možam tolki zdahadvacca, što zdaryłasia. Ale, adkryta skažu, ja nie ździŭleny padobnym, nazirajučy za ahidnaj, niastrymnaj i całkam adkrytaj tatalnaj pjankaj na vulicach Minska. Asabliva ŭ haradku zaŭziatara, u samym sercy biełaruskaj stalicy, la byłoha Pałaca sportu. Naviedaŭ bolš za 20 čempijanataŭ śvietu, ale takoj vakchanalii nikoli nie bačyŭ nikoli! U hetaj fan-zonie nie tolki ŭsiu noč piva bje fantanam, tut biez abmiežavańnia raźlivajuć lubyja mocnyja napoi. Mnie strašna hladzieć na natoŭpy pjanaj moładzi, jakaja pje harełku z horła navat u aŭtobusach. U hetym prasłavutym haradku zaŭziatara rehularna ź luboj pryčyny ŭspychvajuć bojki. Bačyŭ pazaŭčora na svaje vočy, jak chłopiec lacieŭ praz stoł ŭniz hałavoj.
Usio heta prosta žachliva. Ja razumieju, arhanizatary ČS-2014 chacieli zrabić jak lepš. Ale nielha ž davodzić da absurdu! Suśvietnaja arhanizacyja achovy zdaroŭja, darečy, 12 maja nazvała Biełaruś samaj ałkalizavanaj krainaj śvietu.
Kamientary