Rumas: Naša ekanomika pakul nie pačała papraŭlacca

Biełaruskaja ekanomika pakul nie pačała papraŭlacca. Takoje mierkavańnie vykazaŭ staršynia praŭleńnia AAT «Bank raźvićcia Respubliki Biełaruś» Siarhiej Rumas 12 lutaha ŭ Minsku, adkazvajučy na pytańni žurnalistaŭ. 

Kamientujučy pryčyny vysokich pracentnych stavak, jakija skłalisia na finansavym rynku Biełarusi, Rumas nahadaŭ, što takaja situacyja doŭžycca z 2011 hoda. 

«Vysokija pracentnyja staŭki, jakija ŭstanavilisia ŭ 2011-m, byli abarončaj reakcyjaj ekanomiki na likvidacyju nakoplenych dysbałansaŭ, źviazanych u pieršuju čarhu z ustanaŭleńniem realnaha abmiennaha kursu biełaruskaha rubla», — adznačyŭ Rumas. 

Tamu, dadaŭ jon, dla 2011—2012 hadoŭ vysokija pracentnyja staŭki «byli absalutna narmalnaj situacyjaj». U nastupnyja hady, zhodna z čakańniami ŭrada, uzrovień pracentnych stavak pavinien byŭ źnižacca, nahadaŭ Rumas. 

«Heta pa anałohii z tym, jak čałaviek reahuje na chvarobu. Spačatku tempieratura vyrastaje da maksimalnaj miažy i potym, pa miery taho, jak adbyvajecca lačeńnie, tempieratura viartajecca ŭ normu. Razam z tym u našym vypadku hetaha nie adbyłosia», — kanstatavaŭ jon. 

Havoračy ab zachavańni vysokich pracentnych stavak na finansavym rynku, kiraŭnik Banka raźvićcia nazvaŭ niekalki pryčyn hetaha. 

«Heta i niespryjalnaja kanjunktura na źniešnim rynku ŭ hety pieryjad, i pytańni kankurentazdolnaści ajčynnaj pradukcyi, i, kaniešnie, uzrosšy ź siaredziny 2012 hoda abjom finansavańnia dziaržaŭnych prahram», — skazaŭ Rumas. 

Uličvajučy, što pracentnaja staŭka pa dziaržprahramach subsidujecca dziaržavaj, pradoŭžyŭ jon, pazyčalniku, u pryncypie, było ŭsio roŭna, jaki jaje ŭzrovień.

«Popyt na takija kredyty sparadžaŭ prapanovu, banki pryciahvali resursy, pa sutnaści, pa luboj canie, układvajučy ŭ dziaržprahramy, nahruzku pa jakich u kančatkovym vyniku nios biudžet», — patłumačyŭ bankir.

Adkazvajučy na pytańnie, ci treba źnižać pracentnyja staŭki ŭ ciapierašniaj situacyi, kiraŭnik Banka raźvićcia adznačyŭ, što Nacbank administracyjna zrabić heta nie moža. 

«Efiekt ad źnižeńnia pracentnych stavak budzie tolki ŭ tym vypadku, kali samo źnižeńnie budzie padmacavanaje mierami ekanamičnaj palityki. Sama pa sabie dastupnaść kredytaŭ pavysić inflacyjnyja čakańni i budzie sadziejničać rostu impartu», — skazaŭ Rumas. 

Reziumujučy, kiraŭnik Banka raźvićcia źviarnuŭ uvahu na ŭsio jašče vysokija paramietry inflacyi. «Papiarednija źviestki studzienia havorać, što naša ekanomika, na žal, nie pačała papraŭlacca», — adznačyŭ bankir.

Jak paviedamlałasia raniej, u studzieni inflacyja ŭ Biełarusi skłała 1,6%. Aficyjny prahnoz urada pa inflacyi na 2014 hod — 11%.

• 0
• 0
• 0
• 0
• 0
• 0
• 0
• 0