«Nacysckaje» ankietavańnie ŭ škole na Brestčynie: pytańni ŭziali z rasijskaj knihi
Supiarečlivuju apytanku prybrali dziakujučy pilnym baćkam.
19 studzienia ŭ internecie źjaviŭsia fotazdymak ankiety «Patryjot i hramadzianin» z paznakaj «6 kł.» Ankieta ŭtrymlivała 20 śćviardžeńniaŭ, ź jakimi treba było pahadzicca, nie pahadzicca ci napisać niejtralnaje «nie viedaju».
Mnohich karystalnikaŭ sieciva aburyŭ punkt №11, u jakim razhledzieli rasiscki padtekst: školnikaŭ paprasili acanić śćviardžeńnie «niespraviadliva stavić ludziej ź ciomnym koleram skury kiraŭnikami nad biełymi ludziami». Paŭstaje pytańnie, ci ŭvohule zmohuć šaścikłaśniki pravilna razabracca ŭ śćviardžeńni z admoŭjem.
Adnak i inšyja śćviardžeńni vyhladajuć prynamsi dziŭna: «tyja, chto krytykuje padziei ŭ krainie, nie mohuć ličycca sapraŭdnymi patryjotami», «kali ŭličyć usie «za» i «suprać», dyk zachoŭvańnie ŭ krainie zamiežnych jadziernych adchodaŭ pryniasie bolš finansavaj karyści za ekałahičnuju škodu», «sudziejstva ŭ dačynieńni da «našych» na mižnarodnych spabornictvach časta nie spraviadliva», «sapraŭdnaj relihijaj moža być tolki adna — adzinaja relihija», «apynuŭšysia za miažoju, ja pastarajusia, kab mianie nie ŭsprymali jak biełarusa» i h.d.
Sajt by24.org paviedamlaŭ, što ankietu nibyta razdavali ŭ adnoj ź minskich škołaŭ, a zaśniaŭ jaje šaścikłaśnik.
Nasamreč «vypadak z ankietaj» adbyŭsia daloka ad stalicy. Žurnalist «NN» vyśvietliŭ, što radzimaj apytanki «Patryjot i hramadzianin» źjaŭlajecca vioska Mokraje Pružanskaha rajona.
Namieśnica dyrektara mokraŭskaj škoły pa navučalnaj rabocie Ryta Martyniuk raskazała «NN», što ankietu padrychtavała jaje kaleha Taćciana Asipčuk, namieśnica dyrektara pa vychavaŭčaj rabocie. Sama Asipčuk u dadzieny momant znachodzicca na siesii i nie zmahła adkazać na pytańni žurnalista.
«Kiraŭnictva škoły rychtujecca da piedsavietu pa vychavaŭčaj pracy. Z hetaj nahody było vyrašana pravieści apytańnie vučniaŭ. Heta ŭłasnaja inicyjatyva škoły, a nie zahad vyšejšaha orhana adukacyi», — patłumačyła Martyniuk.
Pieršaj spravaj ankietu vyrašyli razdać šaścikłaśnikam. Jaje možna było zabrać dadomu, tamu apytanku pabačyli baćki. Ad ich i stali pastupać tryvožnyja zvanki.
«Paśla paviedamleńniaŭ baćkoŭ my aznajomilisia z ankietaj i ŭbačyli, što niekatoryja pytańni sapraŭdy vielmi supiarečlivyja i ŭvohule nie majuć ničoha ahulnaha z patryjatyzmam, hramadzianskaściu ci biełaruskaściu. Tamu dadzienuju ankietu my anulavali i nie vydavali jaje nikomu, akramia šostaha kłasa. Dadzienyja, atrymanyja ŭ vyniku ankietavańnia, nie buduć nidzie vykarystanyja», — zapeŭniła Ryta Martyniuk.
Namieśnica dyrektara padziakavała baćkam, jakija cikaviacca žyćciom dziaciej i apieratyŭna paviedamili školnamu kiraŭnictvu ab incydencie. U kancy hutarki Martyniuk vykazała zdahadku, što, chutčej za ŭsio, Taćciana Asipčuk prosta ŭziała śćvierdžańni ź inernetu, a nie raspracoŭvała ankietu samastojna.
Zdahadka supracoŭnicy akazałasia praŭdaj. Śćviardžeńni dla apytanki ŭziatyja z rasijskaj knihi «Vychavańnie talerantnaści ŭ šolnikaŭ: teoryja, mietodyka, dyjahnostyka» aŭtarstva navukovaha supracoŭnika Instytuta teoryi adukacyi i piedahohiki Rasijskaj akademii adukacyi P.V.Ściapanava. U aryhinale test utrymlivaje 45 śćviardžeńniaŭ i 5 varyjantaŭ adkazaŭ na ich.
Dadzieny test aktyŭna abmiarkoŭvali ŭ runecie ŭ 2011-2013 hadach, kali, pavodle rasijskich krynic, ankietavańnie pa vyjaŭleńni ŭzroŭniu talerantnaści masava pravodziłasia ŭ Rasii. Niekatoryja baćki rasijskich školnikaŭ aburalisia tym, što praz hety test rasijskija ŭłady žadajuć vyjavić niełajalnych da dziaržaŭnaj palityki navučencaŭ.
Kamientary