Za admovu słuchać aficyjny himn nastaŭnica źbiła školnicu ŭ Baranavičach
U Baranavičach nastaŭnica siaredniaj škoły № 14 źbiła čaćviarakłaśnicu, vučanicu adzinaha ŭ horadzie biełaruskamoŭnaha kłasa Jasiu Małaščanku za admovu słuchać aficyjny himn.
Jak raspaviadaje maci dziaŭčynki, kaardynatarka arhkamiteta pa stvareńni BCHD Taćciana Małaščanka, incydent zdaryŭsia na ŭroku muzyki, kali nastaŭnica raspaviadała pra aficyjnyja dziaržaŭnyja simvały.
Na heta dziaŭčynka zajaviła, što ličyć himn drennym, bo ŭ im nie śpiavajecca pra Boha, i nazvała svaim himnam śpieŭ «Mahutny Boža».
Na heta nastaŭnica pasprabavała pieraŭpeŭnić dziaŭčynku ŭ važnaści aficyjnaha himna, raspaviadajučy pry hetym pra svaje ŭjaŭleńni pra toje, jak choraša žyłosia ŭ SSSR.
Zatym jana pačała śpiavać aficyjny himn, ale, ŭbačyŭšy, što Jasia zakryła vušy rukami, nakinułasia na jaje, pačała adciahvać jaje ruki ad vušej i bić pa rukach.
Kali ž daviedzienaja da ślozaŭ dziaŭčynka pasprabavała vyjści z kabinieta, nastaŭnica pačała ździrać ź jaje zaplečnik, praciahvajučy bić pa rukach.
Zatym jana vyjšła z kłasa, pryhraziŭšy raspavieści pra ŭsio zavuču, ale chutka viarnułasia i adpuściła raspłakanuju dziaŭčynku z uroka.
Maci Jasi Małaščanki pryčyny takich pavodzinaŭ nastaŭnicy nie razumieje i kaža, što ŭ minułyja hady jana siabie tak nie pavodziła.
«Ja razumieju, kali b jana zapatrabavała dačku pakinuć kłas, zrabiła b zaŭvahu ci heta dalej. Ale ž toje, što jana pačała bić, ja liču niedapuščalnym», — padkreśliła Taćciana Małaščanka.
Pry hetym žančyna padkreśliła, što ŭroki muzyki ŭ škole źjaŭlajucca fakultatyŭnymi i za ich adznaki nie staviacca. U toj samy čas Jasia Małaščanka asobna chodzić u muzyčnuju škołu.
Ni nastaŭnica, ni administracyja škoły prabačeńniaŭ dziaŭčyncy ci jaje baćkam nie prynieśli.
Na ŭroki muzyki jaje ciapier zaprašajuć, prapanoŭvajučy prychodzić praz 10–15 chvilin, kali skončvajecca vyvučeńnie aficyjnaha himnu. Ale dziaŭčynka baicca chadzić na ŭroki śpievaŭ. Baćki nie vyklučajuć, što mohuć napisać prašeńnie dazvolić ichniaj dačce nie naviedvać uroki muzyki ŭ škole.
-
«Ja zaŭsiody byŭ praŭkrainskim čałaviekam». Biełarus amal 20 hadoŭ pracavaŭ u Maskvie — voś što ź im adbyłosia paśla 2022‑ha
-
U Biełarusi — 365 ekstremisckich farmavańniaŭ i arhanizacyj
-
«Byvajuć prosta bolevyja zapoi. Kali ty z bolu nie vyłaziš…». Halina Kazimiroŭskaja — pra baraćbu z ankałohijaj, chimijaterapiju i toje, čamu nie ŭmieje prasić dapamohi
Ciapier čytajuć
Piać dzion, 60 udzielnikaŭ, saŭna, biljard i kryki adno na adnaho. Raskazvajem, jak prajšła zakrytaja «hulnia Mackieviča»59
Kamientary