Pryhody rasiejcaŭ u Minsku: što turysty pišuć pra našu krainu?

U Rasii na majskija śviaty byli vialikija vychadnyja. Faktyčna, kraina hulała ad 1 da 13 maja. Mnohija susiedzi padalisia na kanikuły ŭ Biełaruś. Heta stała fienomienam dla Biełarusi: taki napłyŭ turystam.

«Hetych hrošaj u mianie navałam pakul što»

Nie zaŭvažyć rasiejcaŭ u Minsku i inšych haradach krainy było składana.

Hości adrazu dali pra siabie znać. Mašyny z rasijskimi numarami parkavalisia na piešachodnych zonach i bardziurach. Rasiejcami kišeli kaviarni i supiermarkiety. «Heeetych hrošaj u mianie navałam pakul što», — pačuŭ błohier Viktar Mališeŭski ŭ adnym z mahazinaŭ.

«Rasiejcaŭ była bolšaść, — kaža Volha, administratar hatela ŭ Niaśvižy. — Braniravali roznyja numary: ad standartnych da vip-aŭ. Samy darahi — prezidenckija apartamienty, jaki kaštuje 1 850 000 rubloŭ, — taksama byŭ zaniaty susiedziami z ŭschodu».

«Turysty stali bolš vychavanyja»

«Ja nie vielmi lublu pracavać z rasiejcami, bo jany zaŭsiody staviacca da haspadaroŭ jak da prysłuhi, — raskazvaje haspadynia ahrasiadziby «Rodny kut» Julija Buka. — Praŭda, adpačyvaŭ niejak turyst z Maskvy, trenier dziciačaj kamandy. Na Novy hod jon dasłaŭ nam paštoŭku na biełaruskaj movie, kazaŭ, što vielmi ŭ nas spadabałasia».

Andrej, uładalnik siadziby «Zaračany» pad Puchavičami, kaža, što apošnim časam turysty źmianilisia. Maŭlaŭ, heta ŭžo nie tyja rasiejcy, jakija pryjadzžali kolki hadoŭ tamu, jany stali bolš vychavanyja.

Haspadary siadziby «Lasnaja palana» la Astrašyckaha Haradka taksama zaŭvažajuć, što turysty ŭ hety raz trapilisia vielmi pazityŭnyja. Adna para abaviazkova źbirałasia na 9 maja ŭšanavać pamiać zahinułych i pajechała ŭskładać kvietki da tanka ŭ Astrašycki. «Rasiejcy hladziać pierš za ŭsio, kab było kamfortna, łaźnia, časta chočuć na koniach pakatacca, stalicu pahladzieć. Kazali, vielmi padabajecca hramadskaje charčavańnie, bo tut troški tańniej, čym u ich».

«Čeki «płaviacca» nulami»

«U nas z pačatku maja pabyvała davoli raznapłanavaja publika, — kamientuje aficyjant bara «Biassonica» Juryj. — Jość vielmi kulturnyja hości, jakim padabajecca adpačyvać u Minsku. A niekatoryja pakazvajuć, što jany z Rasii, i tamu mohuć być haspadarami. Bolš, napeŭna, nachabnych ludziej, jakija chvalacca tym, što jany majuć šmat hrošaj.

«Biassonica» — ustanova daražejšaja za siaredniuju, tamu i ŭ minskich naviedvalnikaŭ čeki «płaviacca» nulami. Uviečary ž rachunki prykładna adnolkavyja, ale na abiedy rasiejcy vydatkoŭvajuć značna bolšyja srodki. Minčuki abiedajuć bolš ścipła. Čaściej zamaŭlajuć harodninu i sadavinu, udzień nie pjuć ałkahol. Rasiejcy ž dazvalajuć sabie bolš va ŭsim.

Dziŭna, što ŭ miescy, dzie vialiki vybar napojaŭ na luby hust, zamaŭlajuć čaściej harełku i piva. U minčukoŭ ža zaraz vielmi papularnyja viski i rom».

«Fota z apošniaj ŭ Jeŭropie dyktatury»

Što tyčycca kulturnaj prahramy, to hości z Rasii cikavilisia ŭ pieršuju čarhu słavutaściami stalicy: naviedvali Płošču Pieramohi, Kurhan Słavy, Muziej avijacyjnaj techniki ŭ Baravoj, fatahrafavalisia la Nacyjanalnaj biblijateki. Jeździli ŭ Mirski i Niaśvižski zamki, a taksama muziej-siadzibu Dudutki.

Šmat chto cikaviŭsia i vajennym minułym krainy — naviedvali miemaryjalny kompleks Chatyń, Liniju Stalina, Bresckuju krepaść. Dla amataraŭ padarožničać na mašynie ŭlubionym miescam stała Biełaviežskaja pušča.

U instahramie cheš-teh (klučavoje słova) #minsk byŭ zapoŭnieny partretami rasiejcaŭ na fonie słavutaściaŭ biełaruskaj stalicy. Adzin karystalnik papularnaj sacsietki vykłaŭ fota siabie lubimaha u Trajeckim pradmieści i nieŭzabavie dadaŭ kamientar: «U apošniaj jeŭrapiejskaj krainie z dyktaturaj, ale dla staličnaha horada tut vielmi čysta i cicha».

«Pytali, čamu amal nie čuvać movy»

Minski ekskursavod Andrej Makajonak, jaki vandravaŭ pa stalicy z rasiejskimi turystami, kaža, što hości pavodzili siabie davoli kulturna i ścipła.

«Pieršaj majoj hrupaj byli studenty z Maskvy, — kaža Andrej. — Davoli pryjemnyja ludzi, jakija cikavilisia našaj historyjaj. Z pavahaj stavilisia da VKŁ, majho niehatyŭnaha staŭleńnia da spadara Suvorava i h.d. Žychary rasiejskaj stalicy navat vykazali spačuvańnie, što Minsk pieraŭtvarajecca ŭ niejkuju maleńkuju Maskvu: jany vielmi «krasamoŭna» apisvali novy «dom Čyža», što ŭ Trajeckim, a taksama chmaračos, što dabudoŭvajecca na Niamizie. Pytali, čamu amal nie čuvać movy, stavili ŭ prykład Kijeŭ.

Druhimi byli studenty z Tuły. Vielmi adroźnivalisia ad maskvičoŭ. Minsk ich uraziŭ, kazali: «Amal jak u Jeŭropie». Nie zrazumieli pryhažości našaj Nacyjanalnaj biblijateki. Byli siarod ich i asoby, jakija ŭsio ž sprabavali niejak paździekavacca z movy, ale ž hety adziny vypadak i kazać pra niejkuju pavalnuju niepavahu nielha».

Z handlovych centraŭ bolš za ŭsio rasiejcy ŭpadabali «Stalicu». Suvieniry nabyvali i ŭ novych kramkach, što na Sabornaj Płoščy. Cikavilisia pieravažna tymi rečami, što byli vykananyja na biełaruskaj movie.

«Mahu skazać, što toje pakaleńnie rasiejcaŭ, što raście ciapier i što pryjazdžaje da nas, — heta pieravažna ludzi kulturnyja i pryjemnyja, — padvodzić vynik Andrej Makajonak. — Advarotnyja prykłady — heta tyja, kamu ŭžo za 30—40, jakija majuć hrošy. Takija ludzi prykłady niepavahi, pantoŭ, chamstva i nachabstva. Prytym žančyny siabie pavodziać značna horš za svaich spadrožnikaŭ-mužčyn».

Rasiejcy pišuć

(kamientary uziatyja z sacsietak, forumaŭ u internecie):

«U Minsku my nie ŭbačyli nivodnaha kijoska ź pivam, cyharetami, nijakich zabiahałavak, typu šaŭrmy, chot-doha i inšych hadaściaŭ. Usio prosta i jak byccam 20-25 hadoŭ tamu pry Sajuzie. Na budynkach sierp i mołat z mazaiki, prastornyja chodniki i svabodnyja kavałki ziamli zasiejany travoj i kvietkami, a nie tratuarnaj plitkaj. Nijakich vyrodlivych šklanych budynkaŭ u 40—50 pavierchaŭ. I što b tam ni kazali pra biełarusaŭ, ja skažu tak: vielmi miłyja, haścinnyja i čamuści ŭsie z vydatnym pačućciom humaru ludzi».

«Pryhožyja kutki pryrody la azior, jakija nikim nie zachoplenyja. Biary i buduj sabie domik. U nas usio ŭžo raściahnuta na łapiki i znajści niešta dla siabie składana. Ja b da vas pierajechaŭ na piensii, kali zachavajecie taki zapaviednik da hetaha momantu».

«Vielmi spadabaŭsia stan daroh, čyścinia ŭ haradach, jakaść praduktaŭ (asabliva piva). Usiudy pracujuć kazino i aŭtamaty. Bienzin, jaki kuplajecca ŭ nas, kaštuje tańniej, čym u Rasii, heta jak?! U Minsku ŭsie jeduć 60 kiłamietraŭ u hadzinu, amal nichto nie parušaje pravił. Nad palami busły lotajuć. Karaciej kažučy, dla zaMKADyša, jaki pracuje ŭ Maskvie, — kulturny šok».

«Nasamreč u Biełarusi spadabałasia amal usio. Akramia rasiejcaŭ z maskoŭskimi numarami — voś užo sapraŭdy dzikija ludzi».

Biełarusy pišuć

«Učora prastajaŭ u «Hipa» na Łahojka 30 chvilin u čarzie. Ź dziciem. Rasiejcy z kalaskami brali harełku i kaŭbasu (mabyć, aŭtobus turystyčny). Cikava, navošta?»

«Kali ŭ hości — to zaŭsiody rady. Adčuvajcie siabie jak doma, ale nie zabyvajcie, što vy ŭ haściach».

«Dy jakaja roźnica, chto jość chto — braty, svajaki i inšaje. Nie treba hladzieć na haściej jak na vorahaŭ. Dziakujučy turystam budzie raźvivacca i naša kraina. Voś tolki sapraŭdy chočacca ad rasiejcaŭ bolš pavahi. Niachaj u nas inšaje žyćcio, ale heta naša žyćcio. I kraina naša zaviecca BIEŁARUŚ».

«Haspadary pryjechali ahladać svoj paŭnočna-zachodni kraj».

«Niachaj jeduć. Užo jany dakładna padtrymajuć łozunh «Kuplajcie biełaruskaje!»

• 0
• 0
• 0
• 0
• 0
• 0
• 0
• 0