Abličča Božaj Maci ŭ adsielenaj vioscy: mierkavańni miascovaj žycharki i vučonych
Hady dva tamu ŭ nievialikaj vioscy Hubarevičy Chojnickaha rajona, adsielenaj paśla čarnobylskaj katastrofy, zdaryłasia nievytłumačalnaje --na zrezie suka mahutnaha staroha viaza prajaviŭsia malunak, vielmi padobny na abraz Baharodzicy ź niemaŭlatkam. Słava pra "cud" z dapamohaj internetu chutka raźniesłasia, u Hubarevičy paciahnulisia pałomniki. Viaz abharadzili płotam, upryhožyli kvietkami, ručnikami i stužkami, siudy prychodziać pamalicca i paprasić Božuju Maci pra zapavietnym i nabalełaje.
"Heta dabrasłavieńnie, niejki sihnał, dar -- i nie pavieryć hetamu nielha, --padzialiłasia z karespandentam BiełaPAN miascovaja žycharka Halina Chaciła. - Ja vieru i chaču, kab i ludzi vieryli. I kab Maci Božaja była ŭ nas daŭžej, kab nie źnikła . Kali za joj budzie dohlad, jana adčuje łasku i addaść jaje ludziam. Jak dahladać? Abharadzić, kvietački pasadzić, prychodzić siudy i malicca, prasić jaje, kab dapamahła, zachavała našych ludziej, jakija paciarpieli ad Čarnobyla".
Videakadry z prośbaj prakamientavać my pakazali aŭtarytetnamu śpiecyjalistu -- zahadčyku łabaratoryi intradukcyi draŭnianych raślin Centralnaha bataničnaha sadu NAN Biełarusi, kandydatu bijałahičnych navuk Iharu Haranoviču.
"Toje, što my bačym, -- heta praces zarastańnia rany na drevie, --tłumačyć jon. -- Byŭ śpiłavany suk, davoli vialiki pa dyjamietry, -- i voś z usich bakoŭ utvarajecca napłyŭ kambijalnaj tkaniny. Takim čynam dreva imkniecca abaranicca, kab z časam rana mahła zaraści. Heta naturalny praces, ułaścivy ŭsim parodam dreŭ, nie viedaju, što tut takoha cudoŭnaha.
Malunak sam pa sabie vyjaŭny, heta hadavyja kolcy. Mnie, naprykład, vielmi padabajecca, jak zarastaje buk. Vy viedajecie, što, vykarystoŭvajučy śpiły dreva, robiać roznyja vyraby -- malunak hadavych kolcaŭ sam pa sabie vielmi pryhožy".
Vučony paraiŭ zamazać śpiły antysieptykam, farbaj, kab dapamahčy drevu chutčej spravicca z traŭmaj.
"Na kožnym śpile zastajucca ślady hadavych kolcaŭ, -- dapaŭniaje kalehu staršy navukovy supracoŭnik łabaratoryi Michaił Aŭdzievič. -- U dadzienym vypadku heta śpił suka, zrobleny ŭ takim ŭdałym miescy -- vyjaviŭsia malunak, jaki možna ŭsprymać u niejkim nabližeńni jak abličča ikony Božaj Maci.Dumaju, kali b hety śpił byŭ trochi pad inšym kutom ci na inšaj adlehłaści ad stvała, to hety malunak nie vyjaviŭsia b. Tak što ŭ najaŭnaści prosta źbieh abstavinaŭ".
Kamientary