Ambasadar z dyplomam MHIMO padaŭ u adstaŭku

Pasoł Polščy ŭ Biełarusi Tadevuš Paŭlak padaŭ zajavu pra adstaŭku. Heta redki vypadak u dyplamatyčnaj praktycy. Adstaŭku pasła kamentujuć Ihar Lalkoŭ i Marak Bućko.

Ihar Lalkoŭ, staršynia mižnarodnaj kamisii Partyi BNF:

— Jak Vy možacie acanić pracu sp.Paŭlaka jak pasła?

— Tadevuš Paŭlak — pradstaŭnik staroj dyplamatyčnaj škoły, jaki pačaŭ karjeru jašče za časami PNR. Tamu jaho pracu ŭ Biełarusi ja razhladaju jak hanarovuju j pieradpensijnuju.

— Čamu T.Paŭlak padaŭ u adstaŭku adrazu paśla taho, jak viarnuŭsia ŭ Biełaruś?

— Paŭlak zaŭsiody byŭ prychilnikam levych. A kali na vybarach pieramahli pravyja, Paŭlak zrazumieŭ, što jaho ŭsio roŭna chutka adkličuć. Tak što pryčyny źviazany z farmavańniem novaha pravaha ŭradu, tamu jon zhulaŭ na apiaredžańnie.

— Pieramoha pravych i stała katalizataram adstaŭki?

— Taksama katalizataram byŭ artykuł u hazecie «Žečpaspolita» pra napružanyja stasunki j supraćstajańnie sp.Paŭlaka ź inšymi pradstaŭnikami biełaruskaŭ ambasady, u tym liku Andrejem Čuchrytam, jaki, darečy, u maładości ŭdzielničaŭ u biełaruskim ruchu na Biełastoččynie.

— Ci mahčyma, što ambasadaram ci časovym pavieranym stanie niechta z tych dyplamataŭ, što ciapier pracujuć u Biełarusi?

— Dumaju, heta budzie novy čałaviek. I, chutčej, techničnaja asoba, što źviazana z prezydenckimi vybarami, jakija chutka projduć u našaj krainie. Polski bok nie zachoča iści na kanflikt.

Marak Bućko, da leta 2005 hodu — daradca ambasady Polščy ŭ Biełarusi, ciapier — hałoŭny specyjalist Varšaŭskaj meryi:

— Jakaja Vaša reakcyja na adstaŭku spadara Paŭlaka?

— Samaja pazytyŭnaja. Nie nalivajecca maładoje vino ŭ staryja miachi. Kali Polšča dumaje pra źmienu svajoj palityki ŭ Biełarusi, bo staraja paciarpieła fijaska, dyk hetym maje zajmacca novy čałaviek. Toj fakt, što jon padaŭ u adstaŭku, nia značyć, što jon adrazu vyjedzie ź Biełarusi, jon moža zastacca jašče niekalki miesiacaŭ. I heta nia nadta dobra, bo pierachod da palityki krytyčnaha dyjalohu vymahaje dakładnaj kancepcyi j stałaj uzajemasuviazi pamiž ambasadaj i MZS Polščy. Ja mocna sumniavajusia, što sp.Paŭlak budzie zdolny naładzić hetuju ŭzajemasuviaź. Da taho ž isnuje prablema konsułaŭ u Horadni j Bieraści. Heta čynoŭniki staroj farmacyi, i jany taksama musiać być zamienienyja.

— Zhodna z našymi źviestkami, u ambasadzie isnavaŭ asabisty kanflikt pamiž Vami j sp.Paŭlakam?

— Nie, ale isnavaŭ pamiž im i ŭsimi astatnimi supracoŭnikami ambasady. Paŭlak — typovy rabotnik staroj systemy (jaho dyplamatyčny staž — 43 hady) z «dyplomam» rasiejskaha MHIMO, dzie navučaŭsia. U inšych supracoŭnikaŭ ambasady inšyja pohlady na supracoŭnictva dźviuch krain. Pa-druhoje, sp.Paŭlak dazvalaŭ sabie publičnaje šalmavańnie supracoŭnikaŭ ambasady, što ŭ vyniku vyliłasia na staronki polskich hazet. Budučy adklikanym u Varšavu, Paŭlak razumieŭ, što adziny dla jaho šaniec viarnucca — za ŭradam Marka Belki. Jamu heta ŭdałosia, ale ŭsio ž praź niekatory čas jon sam padaŭ u adstaŭku. Chiba jon chacieŭ, kab usio vyhladała mienavita tak. Spadziajusia, što novy ambasadar budzie čałaviekam novaj hieneracyi, jaki zrobić jak maha bolš dla naładžvańnia siabroŭskich uzajemaadnosinaŭ miž dźviuma našymi krainami.

Źmicier Dryhajła

• 0
• 0
• 0
• 0
• 0
• 0
• 0
• 0