Спойлер: пра існаванне некаторых вы не падазравалі.
Кіраўніца кампаніі «Наш дом» Вольга Карач, якая жыве ў Вільні, яшчэ некалькі тыдняў таму анансавала аб стварэнні кааліцыі. Цяпер яе планы матэрыялізаваліся, утварэнне атрымала назву ШАС (Штаб аб’яднаных сілаў) — па-руску ШОС. Паглядзім, хто ўпісаўся ў гэтую ініцыятыву.
Дзмітрый Шчыгельскі
Доктар-псіхіятар. Вядомасць у Беларусі набыў у 2001 годзе, калі завочна паставіў дыягназ Аляксандру Лукашэнку. Пасля гэтага перабраўся ў ЗША, жыве ў Нью-Ёрку. Сам сябе пазіцыянуе як «сярэдні бізнэсмен». Ездзіў на вайну ва Украіну добраахвотнікам, аказваў байцам паслугі псіхолага і псіхіятра. Быў сярод тых «змоўшчыкаў», якія нібыта рыхтавалі замах на Аляксандра Лукашэнку. Быў у сяброўскіх адносінах з Юрасём Зянковічам, якога арыштавалі ў Маскве.
Аляксандр Перапечка
61 год, жыве ў Сіэтле (ЗША). Скончыў аспірантуру БДУ і дактарантуру Вашынгтонскага ўніверсітэта. Доктар філасофіі па спецыяльнасці «Эканамічная, сацыяльная і палітычная геаграфія». Удзельнік міжнародных навукова-аналітычных праграм у Беларусі, Расіі, ЗША і Францыі. Эксперт па статыстычных мадэлях і Усходняй Еўропе. Кансультант па геапалітыцы, геастратэгіі і элітах. Цікава, што нават падчас стрыму аб прэзентацыі ШАС заўсёды называў нашу краіну «Беларуссія». Яшчэ адзін удзельнік зум-канферэнцый, пасля якіх Зянковіча, Фядуту і Кастусёва абвінавацілі ў спробе дзяржперавароту і замаху на Лукашэнку.
Вера Хортан
Акцёрка. Нарадзілася ў 1971 годзе ў Мінску, скончыла філасофскі факультэт БДУ. Жыве ў Лондане, грае ў адным з англійскіх тэатраў, шмат здымалася ў кіно і серыялах. Вядзе блог на ютубе, які мае 72 падпісчыкі. Таксама стваральніца «БелДыяспара ТБ», які мае 1900 падпісчыкаў. «Мяне занесла ў рэвалюцыю пасля 9 жніўня, да гэтага я не займалася палітычнай дзейнасцю», — сказала яна. Кажа, што яе задача — «дапамагчы заходняму грамадству разабрацца ў падзеях у Беларусі».
Яраслаў Грыгор’еў
22 гады. Родам з Калінінграда, маці — беларуска, бацька — расіянін. У сямігадовым узросце пераехаў у Магілёў. Вучыўся ў Беларускім інстытуце правазнаўства. Сябра руху «За Свабоду». На прэзентацыі ШАС падаваў сябе як «нацыяналіста, кансерватара, прыхільніка Паўла Севярынца і Зянона Пазняка». Вядзе малалікія сатырычныя суполкі «Беларусіяна» на ютубе, інстаграме і тэлеграме. Цяпер жыве ў Вільні.
Сяргей Другакоў
Прадстаўнік беларускай дыяспары ў Шатландыі, жыве ў Абердзіне. Родам з Оршы. Больш асабліва сказаць пра яго няма чаго.
Павел Кулажанка
Былы спецназавец з Віцебска, які прымаў удзел у разгоне Плошчы-2010. Жыве ў Брукліне (ЗША), у мінулым баец ММА, цяпер працуе персанальным трэнерам. Інтарэс да беларускай палітыкі з’явіўся пасля выбараў 2020 года, завёў ютуб-канал, а таксама часта раздае інтэрв’ю для эміграцыйных СМІ. Пазіцыянуе сябе як радыкальны прыхільнік пераменаў, стаў голасам ініцыятывы «Супраціў». Прытрымліваецца крайне правых поглядаў. Жорсткі крытык Святланы Ціханоўскай, а таксама яе штаба.
Чытайце яшчэ: Хто такі былы амапавец Павел Кулажанка, які спрабуе стаць радыкальным палітычным лідарам?
Бэла Фокс
Вядучая Радыё Унэт. Прэзентуе сябе як арганізатарка пратэстаў супраць інтэграцыі Беларусі і Расіі ў Кіеве і Будапешце. У Беларусі была міжнародным сакратаром Усебеларускага кангрэсу за незалежнасць. Працавала на «Белсаце» і ў «Прэс-клубе». З’ехала з Беларусі ў пачатку кастрычніка 2020 года. Спікер народнага пасольства Беларусі ў Літве.
***
Шчыгельскі адзначыў, што кааліцыя будуецца на пастулаце, што выбары ў Беларусі ў жніўні не адбыліся і на гэты момант няма законнай улады. Ён сцвярджае, што галоўнае патрабаванне — гэта змена правілаў гульні ў Беларусі, а не проста новыя выбары па старых канспектах.
Чытайце яшчэ: Хто такая Вольга Карач, якая хоча падсядзець Ціханоўскую?
Цяпер чытаюць
«Заходзіш у камеру, а яны кажуць: «Мы з табой адмаўляемся сядзець». Ціханоўскі расказаў, як сутыкнуўся з праблемай нізкага статусу11
Каментары