У Маскве мужчыны масава спрабуюць знаёміцца, мацаючы дзяўчат за ягадзіцы. Так загадаў рабіць сэкс-коўч з Беларусі

Алекс Лэслі — гэта псеўданім 43-гадовага віцебчука Аляксандра Кірылава. У свой час ён скончыў Віцебскі фізіка-матэматычны ліцэй №1, а потым паехаў скараць Расію — паступіў на мехмат МДУ.

Але знайшоў сябе зусім у іншай сферы — стаў трэнерам па знаёмствах і спакушэннях. Лэслі вывучаў усё, што знаходзіў — эрыксанаўскі гіпноз, НЛП, амерыканскія і нават савецкія школы спакушэння. А пасля распрацаваў уласную методыку «лэслізм».

Сусветную вядомасць Алекс Лэслі атрымаў разам з іншай беларускай — Насцяй Рыбкай (сапраўднае імя Анастасія Вашукевіч).

Разам пара праводзіла трэнінгі па спакушэнні, якія шмат хто лічыў сэкс-сектай. У лютым 2018 года Насцю Рыбку і Алекса Лэслі затрымалі ў Бангкоку за правядзенне нелегальных сэкc-трэнінгаў пад выглядам урокаў па спакушэнні. Іх абвінавацілі ў парушэнні тайскага заканадаўства аб барацьбе з прастытуцыяй.

Павялічыць

Сама ж Рыбка лічыла, што іх арышт быў помстай мільярдэра Алега Дзерыпаскі. А ў таго сапраўды была нагода моцна пакрыўдзіцца. У адным з расследаванняў Аляксея Навальнага сцвярджалася, што расійскі віцэ-прэм'ер і кіраўнік апарата ўрада Сяргей Прыходзька ў суправаджэнні Рыбкі адпачываў на яхце Elden мільярдэра Алега Дзерыпаскі, абмяркоўваючы дзелавыя пытанні.

Лэслі і Рыбка спрабавалі прасіць палітычнага прытулку ў амбасадзе ЗША ў Бангкоку, абяцаючы распавесці шмат чаго цікавага. Але нічога не атрымалася. У 2019 годзе іх выпусцілі з турмы ў Тайландзе і дэпартавалі.

Лэслі працягвае займацца сэкс-трэнінгамі — і вось ад яго вучняў пакутуюць дзяўчаты ў Маскве.

У сацыяльных сетках адно за адным з’яўляюцца відэа абураных дзяўчат, якія размаўляюць з тымі самымі гора-плэйбоямі, якія мацалі іх ніжэй за талію, каб пазнаёміцца. Сярод пацярпелых ёсць 17-гадовая дзяўчына, а таксама жанчына на 9-м месяцы цяжарнасці.

Усё адбывалася ў самым цэнтры Масквы. Аднак сцвярджаецца, што гэтая праблема не апошніх дзён — некаторыя дзяўчаты кажуць, што сутыкаліся з дамаганнямі ад вучняў сэкс-коўча яшчэ ў 2024 годзе. Нехта ўжо аднёс заявы ў паліцыю.

Тым часам Лэслі запісаў відэазварот да сваіх вучняў, дзе выказаў незадаволенасць тым, як выконваюць яго заданне:

— Вы што павінны былі зрабіць? Падысці, узяць за азадак, адвесці ў прыбіральню. А паколькі вы не завяршылі этап, яны незадаволеныя.

Тэлеграм-канал «Осторожно, Москва», які належыць Ксеніі Сабчак, абураецца тым, што ў шырокім продажы застаюцца кнігі Алекса Лэслі. У сваіх тэкстах ён распавядае аб тэхніках дамаганняў і вучыць прыціскаць дзяўчат, якія адмаўляюцца ад блізкасці.

Асобны блок Лэслі прысвячае схіленню да сэксу нявінніц, галоўным правілам ён называе: «Калі пачаў, трэба скончыць». Дарэчы, беларускі oz.by таксама гандлюе кніжкамі скандальнага сэкс-коўча, у якіх прапагандуецца гвалт у дачыненні жанчын.

Павялічыць

Тэлеграм-канал «112» паведамляе, што на Алекса Лэслі завялі крымінальную справу за схіленне да згвалтавання. Доказаў дастаткова, бо і самі ўдзельнікі павінны былі здымаць выкананне «практыкавання».

Пакуль сэкс-коўч не затрыманы. Дакладна невядома, ці знаходзіцца ён цяпер у Расіі.

У сваім тэлеграм-канале ён выхваляецца, быццам падаў заяву ў Следчы камітэт Расіі на дэпутатку Дзярждумы Ксенію Гарачаву за яе выказванні з крытыкай яго трэнінгаў: «Калі дэпутатка Гарачава патрабуе праверкі за флірт, тады і яе варта праверыць — на перавышэнне паўнамоцтваў, дыскрымінацыю і палітычны ціск на мужчын».

Свае трэнінгі Лэслі ладзіць не толькі ў Расіі, але і ў Еўропе. Сёлета ён рэкламаваў трэнінг у Варшаве.

• 0
• 2
• 11
• 21
• 3
• 1
• 4
• 1