Беларусы ўцягнутыя ў канфлікт у Кот-д’Івуары
Дагэтуль адзіным на 100% даказаным беларускім сьледам на Беразе Слановай Косткі застаецца паходжаньне «бацькі» знішчальнікаў «Су» Паўла Сухога, які нарадзіўся ў Глыбокім у 1895 г. А вось ці сядзелі беларусы за штурваламі размаляваных «пад акулаў» зьнішчальнікаў Су-25, якія расстралялі дзевяць францускіх міратворцаў ды аднаго амэрыканца, дагэтуль невядома. Міністарка абароны Францыі Мішэль Альё-Мары ды намесьнік кіраўніка эўрапейскага камандаваньня ЗША генэрал Чарльз Ўолд сьцьвярджаюць, што так.
Міністэрства абароны Кот- д’Івуару пераконвае, што налёт зьдзейсьнілі івуарыйскія пілёты, а беларусы-мэханікі толькі абслугоўвалі самалёты. А МЗС Беларусі паведамляе, што грамадзян краіны па дзяржаўнай лініі ў Кот-д’Івуары ўвогуле няма.
«Як жа няма, калі ёсьць у мяне дакумэнты — у мяне ў партфэлі ляжаць: міжурадавае пагадненьне паміж Рэспублікай Беларусяй і Кот-д’Івуарам аб вайсковай узаемадапамозе ў пляне абслугоўваньня тэхнікі…» — абурыўся ў эфіры радыё «Свабода» камандзір брыгады з 15 авіятараў (сярод іх чатыры беларусы), седзячы ў аэрапорце сталіцы краіны Абіджане пад прыцэламі расейскамоўных жаўнераў францускага Замежнага легіёну (ці не было й сярод іх нашых суайчыньнікаў?). Праз тыдзень авіятараў вызваляюць, пра што паведамляе нават МЗС Расеі, пакуль наша МЗС працягвае «правяраць зьвесткі».
Калі ня толькі ЗША, але й краіны Эўразьвязу адна за другой шчыльней займаліся «беларускім пытаньнем», Францыя трымалася крыху ўбаку. Цяпер і ёй Беларусь наступіла на мазоль. Ублытанасьць беларускіх вайскоўцаў у канфлікт у Кот-д’Івуары пагоршыць адносіны з Францыяй.
Толькі ў аўторак МЗС Беларусі прызнала, што сярод пятнаццаці авіятараў, затрыманых Замежным легіёнам, чацьвёра сапраўды маюць беларускае грамадзянства. Між тым, клішэ «беларускія найміты» ўжо замацавалася ў францускай прэсе.
Алесь Кудрыцкі
***
Эканоміка адной з самых багатых (у мінулым) краінаў Заходняй Афрыкі — Кот-д’Івуару ўжо шмат гадоў моцна залежыць ад сусьветных цэн на какаву ды каву. Гэтая афрыканская краіна зьяўляецца галоўным вытворцам какавы на плянэце (41% сусьветнай вытворчасьці) і ўваходзіць у пяцёрку найбуйнейшых вытворцаў кавы. Унікальны клімат дазваляе зьбіраць два ўраджаі какавы на год. У 15-мільённым Кот-д’Івуары 800 тысяч чалавек задзейнічаны ў «какававай» галіне. Праўда, многія з работнікаў плянтацый ня маюць івуарыйскага грамядзянства, а міжнародныя СМІ сьцьвярджаюць, што 90% какавы вырабляецца з выкарыстаньнем працы дзяцей-нявольнікаў.
Поўнасьцю гэты артыкул можна прачытаць у папяровай і pdf-вэрсіі "Нашай Нівы"
Алесь Трафіменка
Каментары