У мінскім мікрараёне Лошыца пачалося будаўніцтва новага каталіцкага касцёла. Пра гэта паведаміла парафія Маці Божай Ружанцовай, піша выданне Katolik.life.

Паводле нядзельных аб’яў пробашча, ужо закупленыя будаўнічыя матэрыялы і арандаваная неабходная тэхніка. Цяпер вядуцца работы для залівання галоўнай пліты будучай святыні. Святар таксама падаў справаздачу аб выдаткаваных сродках.
Будаўніцтва вядзецца выключна за кошт ахвяраванняў вернікаў. Новы касцёл будзе мець статус не проста храма, а санктуарыя Божай Міласэрнасці.
Гісторыя стварэння святыні пачалася яшчэ ў 2014 годзе. На выдадзеным участку ўжо пабудавалі парафіяльны дом і капліцу. З таго часу вернікі праводзяць набажэнствы ў невялікім памяшканні часовай капліцы, якога для парафіі відавочна не стае.
Парафія Маці Божай Ружанцовай даволі вялікая і мае перспектывы развіцця. Пра гэта сведчыць тое, што сёлета Першую камунію тут прынялі каля 30 дзяцей.
Цяпер чытаюць
Дырэктар Віцебскага цэнтра сучаснага мастацтва Андрэй Духоўнікаў пераехаў у Сербію — ён расказаў пра даносы ў культуры, неадукаванасць міністраў і чый жа Шагал
Каментары