Расія пачала ставіць антыдронавыя «мангалы» на падводныя лодкі Чарнаморскага флоту
Украінскія ўдары дронамі становяцца ўсё больш эфектыўнымі, і расійскім узброеным сілам даводзіцца абараняць тэхніку ўжо не толькі на перадавой і акупаваных тэрыторыях. Паводле даных брытанскай вайсковай разведкі, кратамі ад дронаў сталі закрываць падводныя лодкі на вайскова-марской базе ў Новарасійску, піша The Moscow Times.
Украіна сваімі марскімі безэкіпажнымі катарамі фактычна выгнала Чарнаморскі флот Расіі з Крыма. Яго базай цяпер стаў Новарасійск, дзе, як сведчыць праведзены Міністэрствам абароны Вялікабрытаніі аналіз спадарожнікавых здымкаў, баявыя рубкі трох падводных лодак цяпер закрытыя антыдронавымі сеткамі. Здымкі былі зробленыя ў перыяд з 6 па 9 чэрвеня.
На адным са здымкаў ад 9 чэрвеня, які 2 ліпеня размясціла Мінабароны Вялікабрытаніі, бачныя дзве падводныя лодкі з сеткамі. У каментарыі разведчыкаў ведамства гаворыцца, што «амаль дакладна» аналагічную абарону неўзабаве атрымае і чацвёртая падводная лодка, якая знаходзіцца на базе. Такія сеткі ў расійскай арміі называюць «мангаламі»; іх ставяць для абароны ад дронаў, якія палююць за баявой тэхнікай, што знаходзіцца за лініяй фронту.
Падводныя лодкі класа Kilo (па класіфікацыі НАТА), пра якія пішуць брытанцы, — гэта дызель-электрычныя падводныя лодкі праекта 877 «Палтус» і ўдасканаленай версіі праекта 636 «Варшавянка». Яны з’яўляюцца аднымі з самых ціхіх няатамных субмарын у свеце, маюць 6 тарпедных апаратаў, здольныя запускаць крылатыя ракеты «Калібр-ПЛ», несці міннае ўзбраенне і пераносныя зенітныя комплексы.
У каментары Мінабароны Вялікабрытаніі ўдакладняецца:
«Гэтыя дзеянні практычна дакладна робяцца ў якасці папераджальнай меры ў адказ на ўсё большую здольнасць Украіны паражаць з дапамогай БПЛА цэлі, якія знаходзяцца на аддаленасці ад лініі фронту».
Базу ў Новарасійску Украіна раней таксама атакавала, у асноўным з дапамогай марскіх дронаў. Каб супрацьстаяць ім, маракі паставілі ў вадзе загароды. «Мангалы» ж, прызначаныя для абароны ад пагроз з паветра, сведчаць пра тое, што цяпер у Чарнаморскім флоце баяцца і налётаў БПЛА.
Пасля таго як УСУ ўзарвалі падчас паветранай атакі Маскоўскі НПЗ у Капотні, каля яго з’явіўся відавочна зняты з фронту зенітна-ракетны комплекс «Панцыр». Ён таксама быў абаронены «мангалам».
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд33
Каментары
Так што публікацыя ў Moscow Times -- гэта ўвачавідная "шляпа".
готовить гораздо приятнее и быстрее :D