Беларус, якога падазраюць у Францыі ў шпіянажы, паспрабаваў патлумачыць, што рабіў каля завода дронаў
55‑секунднае відэа ён адправіў свайму сыну, які вучыцца ў Расіі.
У Францыі па падазрэнні ў шпіянажы за заводам дронаў Delair каля Тулузы затрымалі 47‑гадовага беларуса. Ён фігуруе ў справе як М.А., паведамляе Le Monde з спасылкай на матэрыялы справы. Вось што стала вядома з тых матэрыялаў.
Паводле слоў мужчыны падчас следства, 3 чэрвеня ён апынуўся ў прамысловай зоне камуны Лабеж на паўднёвы ўсход ад Тулузы выпадкова — шукаў аўтамайстэрню, каб адрамантаваць прабітую шыну. Менавіта так ён нібыта і трапіў да завода Delair, які спецыялізуецца на вытворчасці дронаў, у тым ліку для французскай і ўкраінскай армій. Убачыўшы выпрабаванні дронаў у палёце звонку тэрыторыі прадпрыемства, беларус, паводле ўласнага прызнання, быў уражаны і захацеў зафіксаваць гэты момант на відэа, каб падзяліцца ім з сынам.
Менавіта гэтае 55‑секунднае відэа і стала галоўнай улікай для следства: яно было адпраўлена на расійскі нумар тэлефона, які належыць сыну затрыманага — студэнту каля 20 гадоў, які вучыцца ў Расіі.
Мужчына настойвае, што сын застаецца адзіным чалавекам, каму ён паказваў гэтыя кадры.
Калі тэхнікі Delair заўважылі, што мужчына здымае, і папрасілі яго сысці, ён, паводле ўласных слоў, спакойна падпарадкаваўся і не спрабаваў уцячы — бо не лічыў, што зрабіў нешта незаконнае. Нейкі час ён заставаўся ў сваім аўтамабілі непадалёк, а потым паехаў абедаць у рэстаран на выхадзе з прамысловай зоны, дзе яго і затрымалі.
Перад гэтым, 1 чэрвеня, некалькі чалавек кінулі ў будынак завода некалькі кактэйляў Молатава, якія не выбухнулі.
У Францыі беларус зарабляў перапродажам аўто. Ён нарадзіўся ў 1978 годзе, мае двух дзяцей — адно жыве ў Беларусі, другое вучыцца ў Расіі. Афіцыйна ён пражывае ў Іспаніі, аднак ужо каля года перамяшчаецца па розных краінах Еўропы, што дадаткова прыцягвае ўвагу следчых, якія дапускаюць, што падобныя «паслугі» ён мог аказваць і ў іншых дзяржавах ЕС.
Адвакат беларуса настойвае, што справа значна складанейшая, чым яе падае пракуратура, і патрабуе дадатковых праверак.
Цяпер чытаюць
Радзільныя дамы спаборнічаюць, у каго 3 ліпеня народзіцца больш дзяцей16
Каментары