Міраславу Лазоўскаму хочуць надаць званне ганаровага грамадзяніна Роўна
У Роўне 10 чэрвеня адкрылася выстава «Гісторыя беларускага супраціву», арганізаваная дабрачынным фондам «Вільна Білорусь». Экспазіцыя прысвечана барацьбе беларусаў за свабоду і незалежнасць, а таксама сучаснаму супрацьстаянню расейскай агрэсіі і дыктатуры, паведамляе «Радыё Рацыя».
Кіраўнік грамадскага саюза «Білоруська спільнота України» Аляксей Францкевіч падкрэсліў, што выстава мае не толькі гістарычнае значэнне, але і дае магчымасць расказаць украінцам пра беларусаў і Беларусь:
— У зале былі прафесары, па адукацыі журналісты, задавалі пытанні: ці ёсць сёння ў Беларусі наогул журналістыка? Ці цяжка сёння журналістам у тых умовах выконваць сваю працу ў Беларусі? Яны нават не ведаюць, што ў Беларусі няма незалежнай журналістыкі. Шмат чаго не ведаюць украінцы пра нас. Зараз распаўсюджваецца інфармацыя, што з тэрыторыі Беларусі зноўку рыхтуецца наступ. Гэта таксама вельмі шмат каго тут турбуе.
Напярэдадні выставы прадстаўнікі беларускай супольнасці разам з роднымі Міраслава Лазоўскага ўсталявалі беларускі бел-чырвона-белы сцяжок на яго банеры на Алеі Славы ў Роўне.
«Самае галоўнае, што гэта зрабіў сын пляменніцы, які вельмі любіць Міраслава. Для іх гэта вельмі важна. Лазоўскі сучасны беларускі нацыянальны герой. Чалавек, які вельмі шмат чаго зрабіў для Беларусі. Амаль ва ўсіх значных падзеях ён прымаў удзел», — кажа Францкевіч
Таксама грамадскі саюз «Білоруська спільнота України» накіраваў у Роўненскую гарадскую раду зварот аб прысваенні Міраславу Лазоўскаму звання ганаровага грамадзяніна Роўна.
Акрамя таго, беларускія актывісты працуюць над адкрыццём у Роўне прадстаўніцтва «Білоруської спільноти України».
Міраслаў Лазоўскі, вядомы пад пазыўным «Мыш», нарадзіўся ў Мінску 10 ліпеня 1973 года. Скончыў Беларускі нацыянальны тэхнічны ўніверсітэт. У 1995 годзе ўступіў у Беларускае згуртаванне вайскоўцаў. У тым жа годзе ён стаў адным з заснавальнікаў спартова-патрыятычнай арганізацыі «Белы легіён», якая дзейнічала ў Беларусі да пачатку 2000‑х гадоў і займалася выхаваннем і навучаннем моладзі. Быў папулярызатарам беларускай культуры, супрацоўнічаў з выдавецтвам, браў удзел у кніжных кірмашах.
Пасля пачатку масавых рэпрэсій у Беларусі напрыканцы лета 2021‑га Міраслаў пераехаў ва Украіну. Загінуў ён 16 мая 2023 года пры абароне Бахмута ад расійскіх захопнікаў.
Каментары
Вельмі добра, што фонд "Вільна Білорусь" і "Беларуская супольнасць ва Украіне" вядуць такую працу. Выстава "З Україною в серці", прысвечаная беларусам, якія загінулі, абараняючы Украіну і змагаючыся за шанец вызваліць Беларусь, пазбавіўшы Лукашэнку расійскай падтрымкі, аб'ехала ўжо амаль усю краіну, экспанавалася ў амаль трох дзясятках лакацыяў. Шмат хто ва Украіне праз яе даведаўся, што беларусы - другая ў колькасці нацыя, якая ваюе ў шэрагах Сіл абароны Украіны, што беларусы - у самых "гарачых" пунктах і таму, на жаль, аддаюць свае жыцці за ідэалы свабоды.
Гэтая выстава распавядае пра тое, як беларусы аказаліся ў той сітуацыі, якая сёння ёсць. Як яны ўсе трыццаць гадоў дыктатуры змагаліся супраць лукашызму, як зсярэдзіны Беларусі дапамагалі Украіне. І варта сказаць, што яна ўсюды выклікае непадробленую цікавасць аўдыторыі. Стэнды выставы адмыслова напісаныя па-беларуску. І ўкраінцы, чытаючы іх, раптам адкрываюць для сябе, што яны добра разумеюць беларускую мову, ніколі яе не вывучаўшы. А гэта паказвае ім ментальную блізкасць украінцаў і беларусаў.
Шкада, што так званае "прадстаўніцтва дэмсіл" пакуль занятае іншымі клопатамі, акрамя абароны рэпутацыі беларусаў у вачах украінцаў, якую растаптаў Лукашэнка, надаўшы тэрыторыю нашае краіны для ўзброенага ўварвання ва Украіну.