Дэпартаваны беларус вярнуўся ў Расію па прах памерлай жонкі — і атрымаў дзевяць месяцаў калоніі
Суддзя палічыў, што гэта не тыя абставіны, калі можна парушаць забарону на ўезд.
Невельскі раённы суд Пскоўскай вобласці Расіі асудзіў беларуса А. Кацэбу за тое, што той вярнуўся ў Расію, хоць меў забарону на ўезд.
Як вынікае з апеляцыйнай пастановы ад 20 мая 2026 года, гісторыя пачалася яшчэ ў 2023-м. Тады Маскоўскі раённы суд Пецярбурга прысудзіў Кацэбу тры гады зняволення за наркотыкі (ч. 2 арт. 228 КК РФ). У верасні 2025 года яго ўмоўна-датэрмінова вызвалілі, але адначасова прызналі яго знаходжанне ў Расіі непажаданым і вынеслі рашэнне аб дэпартацыі. Мужчыну забаранілі ўезд у Расію на пяць гадоў і пад подпіс папярэдзілі, што за парушэнне забароны яму пагражае крымінальная справа. У той жа дзень яго дэпартавалі ў Беларусь.
Аднак у студзені 2026‑га Кацэба вырашыў вярнуцца ў Пецярбург — паводле яго слоў, каб забраць прах памерлай жонкі і разабрацца з кватэрай у пасёлку Шушары.
Мужчына купіў білет на міжнародны цягнік «Гомель — Санкт-Пецярбург». Праз паўтары гадзіны пасля праходжання мяжы яго зняла з цягніка і затрымала памежная служба ФСБ.
17 сакавіка 2026 года Невельскі раённы суд прызнаў Кацэбу вінаватым у незаконным перасячэнні мяжы (ч. 2 арт. 322 КК РФ) і прызначыў дзевяць месяцаў калоніі строгага рэжыму.
Восенню 2026 года Кацэбу вызваляць — і ў чарговы раз дэпартуюць. Забраць прах жонкі і вырашыць пытанні з кватэрай ён зноў не зможа.
Цяпер чытаюць
У дзень пачатку Пецярбургскага эканамічнага форуму УСУ нанеслі дзясятак удараў па нафтавым тэрмінале ў порце горада і базе Балтфлота ў Кранштаце33
Каментары