Самае жахлівае здарэнне на Алімпіядзе. Польская спартоўка атрымала каньком у вока
Чвэрцьфінал жаночага шорт-трэка на 1500 м на Алімпіядзе ў пятніцу скончыўся кашмарам — полька Каміла Селье трапіла ў завал і атрымала каньком у вока.
Асцярожна — далей вельмі непрыемныя кадры, якія могуць вас шакаваць
Селье ўпала на адным з паваротаў, а канёк суперніцы, якая праскоквала міма, трапіў ёй у твар. Выглядала гэта надзвычай жудасна. Увогуле шорт-трэкісткі выступаюць у ахоўных акулярах, але акуляры Камілы зляцелі яшчэ падчас сутыкнення, піша sports.ru.
Каміле — 25 гадоў, яна двухразовая прызёрка чэмпіянату свету — 2025 у эстафетах. У Мілане Селье да ўзнагарод не дабралася, а цяпер увогуле апынулася ў бальніцы.
Пасля сутыкнення спаборніцтвы перапынілі, вакол Камілы сабраліся дактары. Спартсменка страціла прытомнасць, але хутка апрытомнела. Яе паклалі на насілкі, а калі яна пакідала арэну, змагла паказаць гледачам вялікі палец угару — усё нармальна, я ў парадку. Тым часам работнікі саскрабалі кроў з лёду.
Амерыканку Крыстэн Сантас-Грысволд, якая справакавала завал, дыскваліфікавалі. Яна расплакалася, калі ёй паведамілі, што здарылася з Камілай.
Проста на арэне Каміле наклалі некалькі швоў.
На шчасце, найгоршага не адбылося — вока не пацярпела.
«У Камілы Селье моцны ацёк вока, яна не можа яго расплюшчыць. Парэз на шчацэ зашылі, пашкоджана скулавая костка пад вачніцай. Каміла разам з лекарам едзе ў бальніцу, чакаем транспарт», — распавёў учора прэс-аташэ польскай алімпійскай каманды Конрад Нядзведзкі.
Зараз Селье ў бальніцы, яе здароўю нічога не пагражае.
Пакуль жа Каміле застаецца толькі натхняцца прыкладам галандца Енса Ван’т Ваўта — у 2019 годзе ён перажыў тое ж самае. Канёк Уладзіслава Быканава з Ізраіля трапіў яму ў твар — пакінуў вялікі шнар і выбіў два зубы. Тады Енсу наклалі 15 швоў, але ўжо праз два дні ён вярнуўся на лёд. А ў Мілане-2026 стаў трохразовым алімпійскім чэмпіёнам.
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі15
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары