ЗША выпадкова дэпартавалі мексіканца, якога падазраюць у найбуйнейшым рабаванні каштоўнасцей у гісторыі краіны
Хесан Нелан Прэсілья Флорэс быў затрыманы ў жніўні 2025 года. Паводле следства, ён скраў брыльянты, рубіны, ізумруды, золата і каштоўныя гадзіннікі на суму 100 мільёнаў даляраў. Але ў снежні яго дэпартавалі ў Эквадор без ведама пракурораў, якія рыхтавалі крымінальную справу.
У Злучаных Штатах разгараецца скандал вакол справы аб крадзяжы каштоўнасцяў на суму 100 мільёнаў даляраў.
Федэральныя іміграцыйныя ўлады (ICE) дазволілі аднаму з галоўных падазраваных, Хесану Нелану Прэсілья Флорэсу, добраахвотна пакінуць краіну і вылецець у Паўднёвую Амерыку. Гэты крок шакаваў пракурораў, якія рыхтаваліся адправіць мужчыну ў турму на тэрмін да 15 гадоў.
Флорэс быў адным з сямі чалавек, абвінавачаных у дзёрзкім нападзе на браняваны грузавік у 2022 годзе. Рабаўнікі высачылі машыну на трасе каля Лос-Анджэлеса і, пакуль адзін кіроўца спаў, а другі купляў ежу, выкралі сумкі з дыяментамі, смарагдамі, золатам і люксавымі гадзіннікамі.
Гэтае рабаванне лічыцца самым маштабным у амерыканскай гісторыі.
Кур’ёзнасць і абсурднасць сітуацыі палягае ў няўзгодненасці ведамстваў. Пракуратура лічыла, што Флорэс знаходзіцца пад залогам і чакае суда. Іміграцыйная служба затрымала яго яшчэ ў верасні, не паведаміўшы пракурорам пра наяўнасць прэтэнзій да яго статусу рэзідэнта. У выніку на слуханнях у снежні Флорэс проста папрасіў аб дэпартацыі, і суддзя выдаў загад на яго высылку ў Эквадор.
Юрысты называюць гэты выпадак беспрэцэдэнтным: «Гэта сітуацыя, калі левая рука не ведае, што робіць правая».
Цяпер адвакат Флорэса патрабуе цалкам закрыць крымінальную справу, паколькі яго кліент быў дэпартаваны з краіны самімі ўладамі, што нібыта парушае яго правы на абарону.
Ювеліры, якія страцілі сваю маёмасць, абураныя і патрабуюць адказаў, бо зараз злачынца фактычна пазбег правасуддзя.
Цяпер чытаюць
Разведка ЗША: Беларусь стала перадавым вайсковым плацдармам Расіі31
Каментары