«Магія па-за Хогвартсам». На «Лідскім піве» патлумачылі, чаму выяву майстра на бляшанках з півам друкуюць дагары нагамі
На прадпрыемстве «Лідскае піва» патлумачылі, чаму на бляшанках піва з серыі «Калекцыя Майстра. Пшанічнае» этыкетка выглядае нібыта перавернутай. Многія пакупнікі палічылі гэта звычайнай вытворчай памылкай, якую чамусьці не заўважылі падчас кантролю якасці. Аднак высветлілася, што так было задумана ад самага пачатку, піша Telegraf.news.
У прэс-службе вытворцы з гумарам адзначылі, што са скаргамі на «памылку» на бляшанках да іх звяртаюцца «часцей, чым з просьбамі вярнуць грошы». Таму на прадпрыемстве палічылі патрэбным растлумачыць (ужо не ў першы раз), навошта вытворца наўмысна «перакуліў» выяву на этыкетцы.
«Давайце патлумачым. Асабліва тым, хто да гэтага з гэтага смяецца. Выява «майстра» надрукаваная дагары нагамі, бо для пшанічнага гатунку характэрны асадак. І калі вы трымаеце бляшанку ў руках, вы пераварочваеце яе і перамешваеце. Магія па-за Хогвардсам», — патлумачылі на старонцы «Лідскага піва» ў Threads.
Гэта можна ацаніць як сапраўды разумны ход на мяжы маркетынгу і псіхалогіі. Бо тэкст на этыкетцы, дзе, вядома ж, напісана, што ў гэтым гатунку піва дапускаецца наяўнасць дражджавога асадку і таму бляшанку варта перакуліць перад ужываннем, чытаюць нямногія. А вось не заўважыць, што выява на бляшанцы ў вас у руках нейкая «няправільная», даволі складана — чыста інстынктыўна хочацца перавярнуць бляшанку «правільным» бокам.
Перавярнулі, зразумелі, што «памылку» дапусцілі не вы, а вытворца, перакулілі назад — а напой ужо перамешаны, што і было патрэбна для належнага смаку. Менавіта на гэты псіхалагічны трук падсвядомасці і разлічвае вытворца.
А вось са шклянымі бутэлькамі, у якіх таксама выпускаецца гэтая серыя, такі хітрык ужо не працуе.
Каментары