Той самы Ляшкевіч: выстава вядомага бяздомнага мастака адкрылася ў Гомелі
Больш за 30 работ бяздомнага мастака Валерыя Ляшкевіча можна ўбачыць у гэтыя дні ў Карціннай галерэі Вашчанкі ў Гомелі. Журналісты «Белкі» схадзілі на выставу і даведаліся, чаму ён знік з гарадскіх вуліц.
Яго ведае, бадай, кожны жыхар Гомеля. Амаль трыццаць гадоў Валерыя Ляшкевіча можна было сустрэць у любое надвор'е на Кіеўскім спуску або ў пачатку вуліцы Савецкай. Ён не проста прадаваў свае карціны, а па ўласным прызнанні — выконваў важную місію — далучаў мінакоў да мастацтва.
На вуліцах горада Валерый Ляшкевіч з'явіўся ў 1996 годзе, калі вярнуўся сюды з Санкт-Пецярбурга. У роднай вёсцы Чарапоўцы пад Гомелем яго ўжо ніхто не чакаў. Бацькі памерлі, а ў хаце жыў яго брат з сям'ёй. Тады мастак проста пасяліўся на вуліцы: калі начаваў на чыгуначным вакзале, калі спаў на лаўках.
Увесь гэты час вулічны філосаф не пераставаў маляваць свае незвычайныя карціны, дзе мудрагеліста пераплятаюцца сюжэты. І паступова стаў сімвалам горада.
Валерыя Ляшкевіча заўважылі і ацанілі. У 2014 годзе ў Нацыянальным мастацкім музеі адкрылася выстава бяздомнага мастака. Тады ж тэлеканал АНТ зняў пра яго дакументальны фільм «Скрыжаванне», які заваяваў міжнародныя ўзнагароды. У ім паказана, як талент можа ісці насуперак звыклым нормам і завядзёнкам.
Пра сябе Валерый расказвае, што ён скончыў Бранскае мастацкае вучылішча і з'ехаў скараць паўночную сталіцу Расіі. У Санкт-Пецярбургу мастак некалькі разоў спрабаваў паступаць у Акадэмію мастацтваў імя Іллі Рэпіна, але не паступіў. Тады ён уладкаваўся ў акадэмію дворнікам і нейкі час жыў пры ёй у падсобцы. Калі гэта стала немагчымым, прыняў рашэнне вярнуцца на радзіму.
Валерыю спрабавалі дапамагчы з жыллём улады і неабыякавыя людзі. Нацыянальны мастацкі музей выкупіў некалькі яго работ. Але ён усё роўна вяртаўся на вуліцу.
7 студзеня мастаку споўнілася 76 гадоў. Зараз Валерый жыве на здымнай кватэры, яму дапамагаюць маладая гомельская мастачка Анастасія Талстая з мужам і прыхільнікі яго творчасці. У Валерыя нават з'явіўся ўласны акаўнт у інстаграме, дзе можна сачыць за ягоным жыццём і творчасцю.
На выставу ў Карцінную галерэю Вашчанкі прыйшло шмат неабыякавых гамельчукоў, якія сустракалі мастака на гарадскіх вуліцах і засталіся пад уражаннем ад яго асобы і творчасці. Праўда, сам мастак прысутнічаць на адкрыцці не змог — падвяло здароўе.
«У Валерыя праблемы з нагамі і з сэрцам. У снежні, калі мы рыхтавалі выставу да адкрыцця, ён трапіў у бальніцу і быў у цяжкім стане. Дзякуй богу, усё абышлося», — адказала на пытанне прыхільнікаў творчасці мастака Анастасія Талстая.
З-за таго, што ў Валерыя Ляшкевіча няма беларускага грамадзянства, яму даводзіцца аплачваць вялікія рахункі за лячэнне.
Мастак па-ранейшаму малюе і прадае свае карціны. Цяпер ён лепш уладкаваны ў побытавым плане.
Убачыць выставу «Той самы Ляшкевіч» можна па адрасе: вул. Карповіча, 4. Дарэчы, некаторыя карціны можна будзе пазней выкупіць.
Цяпер чытаюць
Мінгарвыканкам пра вулічнае асвятленне: Гэта была разавая акцыя. Сёння ўключаць а 18-й15
Каментары