Беларускія зубры, якіх узімку прывезлі ў Башкартастан, за тыдзень абраслі доўгай поўсцю
Яны цалкам адаптаваліся да башкірскіх зімаў. Пра гэта расказаў кіраўнік Уфімскага федэральнага даследчага цэнтра Расійскай акадэміі навук, доктар біялагічных навук Васіль Мартыненка, піша mk.ru.
Нядаўна ў Башкартастане вырашылі аднавіць папуляцыю зуброў, якія даўней жылі ў рэгіёне.
Першыя жывёлы, якіх прывезлі з Белавежскай пушчы, з'явіліся тут у 2023 годзе. Некаторыя з завезеных самак ужо былі цяжарныя, а пазней зубры далі патомства ў Башкарстане
— Усе цяляты, якія з’явіліся пасля першага завозу, выжылі, — паведаміў Васіль Мартыненка. — А ў 2024 годзе ўжо нарадзіліся зубраняты непасрэдна тут, на башкірскай зямлі. Так паступова фарміруецца наша папуляцыя.
Нядаўна ў рэспубліку прывезлі яшчэ шэсць зуброў. Іх набыццё і перадачу рэгіёну падтрымалі экалагічна адказныя кампаніі. Адна з самак таксама аказалася цяжарнай.
— Адна з самак нарадзіла цяля ўжо ў вальеры, — тлумачыць эксперт. — Добрае такое цялятка, я яго нядаўна бачыў. Плануецца, што бліжэй да восені жывёл выпусцяць на волю, каб яны паспелі адужэць да зімы. І мы спадзяемся, што далей яны будуць размнажацца гэтак жа, як тыя зубры, якія ўжо жывуць у натуральных умовах.
У адрозненне ад башкірскіх коней, зубры не могуць здабываць корм з-пад глыбокага снегу капытамі.
— Зубр разграбвае снег мордай, — тлумачыць спадар Мартыненка. — Крытычнай для яго лічыцца глыбіня снежнага покрыва каля 40 сантыметраў. Эксперты разумелі, што гэта можа стаць праблемай, але вырашылі паспрабаваць.
Аднак жывёлы даволі хутка паказалі, што здольныя самастойна знаходзіць прыдатныя месцы для зімоўкі.
Башкірскі клімат зубры пераносяць лепш, чым меркавалі спецыялісты. Асабліва паказальным стаў адзін з першых завозаў жывёл.
— У 2023 годзе зуброў прывезлі ў снежні. У цясніне тады было каля мінус 35 градусаў, а ў Беларусі, адкуль яны ехалі, тэмпература была значна вышэйшая — мінус 10 градусаў. Я, шчыра кажучы, перажываў і ўжо вывучаў магчымыя хваробы, думаў, як яны гэта перанясуць, — успамінае спадар Мартыненка.
З-за затрымкі з дастаўкай жывёлы прыбылі ў рэспубліку падчас кароткачасовага пацяплення, але ўжо праз тыдзень зноў рэзка пахаладала.
— За гэты тыдзень у іх настолькі моцна адрасла поўсць, што я быў ашаломлены, — каментуе біёлаг. — Потым тэмпература апусцілася амаль да мінус 40 градусаў, і нашы зубры абсалютна спакойна гэта перажылі. Наколькі яны адчуваюць змены клімату і як хутка адаптуюцца — гэта сапраўды дзіўна.
Цяпер чытаюць
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы2626
Магілёў, Віцебск і Гомель удалося далучыць да БССР толькі таму, што Масква такім чынам хацела спакусіць Заходнюю Беларусь — апублікаваныя дакументы26
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку6363
Каментары