Асацыяцыя перавозчыкаў Літвы: Сітуацыя з фурамі на беларускай мяжы пагаршаецца, перавозчыкі стомленыя і злыя
Прэзідэнт літоўскай нацыянальнай асацыяцыі аўтамабільных перавозчыкаў Эрландас Мікенас распавёў «Свабодзе» пра сітуацыю на беларускай мяжы, дзе захраслі каля тысячы літоўскіх фур з кіроўцамі.
«Сітуацыя стала горшай, чым была ў пятніцу. Беларуская міліцыя пачала ставіць фуры на адмысловыя пляцоўкі, не дае магчымасці даехаць да мяжы. Значыць, перавозчыкі будуць вымушаныя плаціць за стаянку. Калі адкрыюць межы, можа ўжо не трэба будуць гэтыя фуры, гэта стане эканамічна нявыгадна», — паведаміў суразмоўца.
Паводле слоў прэзідэнта асацыяцыі, сітуацыя ўскладняецца адсутнасцю санітарных умоў для кіроўцаў, якія вымушаныя знаходзіцца побач з фурамі.
Некаторыя з іх з'яўляюцца беларускімі грамадзянамі, яны таксама не могуць накіравацца дадому адпачываць, каб не кідаць транспарт.
«Становішча вельмі сур'ёзнае, перавозчыкі стомленыя і злыя. На мяжы каля тысячы цягачоў, мы таксама не ведаем, колькі машын яшчэ ў Беларусі. Дойдзем да таго, што кіроўцы проста кінуць тэхніку і пакінуць яе без нагляду. Вядома, што і многія грузы могуць проста сапсавацца», — кажа Эрландас Мікенас.
10 лістапада стала вядома, што па загадзе Лукашэнкі ўсе літоўскія фуры, якія знаходзяцца ў Беларусі, накіравалі на стаянках ля пунктаў пераходу, узялі пад ахову і патрабуюць аплаты за захоўванне — 120 еўра ў суткі.
«Хачу заявіць: мы гатовы да адкрыцця мяжы даўно. Мы яе не закрывалі. На працягу некалькіх гадзін яна з нашага боку можа аднавіць сваю працу. Памежнікі ў цэлым да гэтага гатовыя», — сказаў Лукашэнка на нарадзе 10 лістапада.
Лукашэнка паведаміў, што літоўскі бок звярнуўся на ўзровень Лідскага памежнага атраду, каб вярнуць свае машыны, што затрымаліся на беларускім баку пасля закрыцця мяжы.
Мытны камітэт Беларусі заявіў, што літоўскія грузавікі пакінуць Беларусь толькі пасля адкрыцця Літвой мяжы.
Цяпер чытаюць
Слесар з Оршы бегаў ад войска на радзіме, каб пасля памерці за Пуціна. Перад адпраўкай на забой для яго закацілі дыскатэку з афрыканцамі15
Слесар з Оршы бегаў ад войска на радзіме, каб пасля памерці за Пуціна. Перад адпраўкай на забой для яго закацілі дыскатэку з афрыканцамі
Пасол Украіны па пытаннях Беларусі адказаў на дыскусію Вячоркі і крытыкаў Ціханоўскай: Ваша ўзаемная непрымальнасць адыгрывае вельмі неканструктыўную ролю4949
Каментары