Вядучыя сусветныя СМІ адмовіліся падпісвацца пад новымі правіламі Пентагона. Ім пагражае пазбаўленне акрэдытацыі

Міністр абароны Піт Хэгсэт апублікаваў праект гэтых правілаў у верасні і загадаў журналістам, што працуюць у Пентагоне, падпісаць іх да 14 кастрычніка — або да 15‑га здаць акрэдытацыі.

Аб адмове падпісвацца пад гэтымі правіламі публічна заявілі, у прыватнасці, сусветныя агенцтвы Reuters і Associated Press, амерыканскія газеты New York Times і Washington Post, брытанская газета Guardian, часопіс Atlantic, тэлеканал CNN, радыёкампанія NPR, інтэрнэт-выданне HuffPost і нават некаторыя ідэалагічна блізкія адміністрацыі Трампа выданні — у прыватнасці, газета Washington Times і выданне Newsmax.

Журналісты заявілі, што лічаць гэтыя новыя правілы замахам на свабоду прэсы і што яны будуць працягваць асвятляць дзейнасць Пентагона і Узброеных сіл ЗША і без акрэдытацыі пры міністэрстве.

Некаторыя з выданняў апублікавалі заявы ў сетцы X, і Піт Хэгсэт адказаў на паведамленні Washington Post, Atlantic і NYT эмодзі з выявай далоні, што махае на развітанне. Прэс-сакратар Пентагона Шон Парнел абвінаваціў прэсу ў тым, што яна падмяняе паняцці, і заявіў, што подпіс пад новымі правіламі азначае не згоду з імі, а пацвярджэнне, што журналісты з імі азнаёміліся. Акрамя таго, Парнел заявіў, што доступ у штаб-кватэру Пентагона — гэта «прывілея, а не права».

Як тлумачыць выданне The Hill, паводле новых правілаў журналістам фармальна не забаронена здабываць і публікаваць не засакрэчаную, але далікатную інфармацыю пра Міністэрства вайны, але пры гэтым яно можа палічыць журналіста «пагрозай бяспецы», калі ён паспрабуе атрымаць такую інфармацыю ад супрацоўнікаў Пентагона.

Да такіх спроб здабыць несанкцыянаваную інфармацыю Пентагон мае намер аднесці і заклікі ў публікацыях і сацсетках да чыноўнікаў і вайскоўцаў дзяліцца такой інфармацыяй.

Іншымі словамі, Піт Хэгсэт хоча, каб прэса публікавала толькі тую інфармацыю, што санкцыянавана кіраўніцтвам Пентагона. «Прапанаваныя абмежаванні падрываюць гарантыі, якія дае Першая папраўка, і накладаюць непатрэбныя абмежаванні на збор і публікацыю інфармацыі», — заявіў у сетцы X выканаўчы рэдактар Washington Post Мэт Мары.

Часопіс Atlantic, рэдактар якога Джэфры Голдберг у сакавіку быў выпадкова ўключаны ў сакрэтны чат, дзе члены каманды Трампа, у тым ліку Піт Хэгсэт, абмяркоўвалі ўдары па еменскіх хусітах, заявіў, што «фундаментальна» не прымае падобныя абмежаванні. Кіраўнік вашынгтонскага бюро газеты New York Times Рычард Стывенсан заявіў, што новыя правілы абмяжоўваюць права журналістаў пісаць пра ведамства, якое атрымлівае ад падаткаплацельшчыкаў амаль трыльён долараў у год.

«Грамадскасць мае права ведаць, як функцыянуе ўрад і войска», — напісаў Стывенсан.

Як нагадвае выданне The Hill, Піт Хэгсэт з самага пачатку свайго прыходу ў Пентагон, з пачатку гэтага года, паступова абмяжоўваў свабоду акрэдытаваных там журналістаў.

Ужо ў канцы студзеня карэспандэнты васьмі выданняў, у тым ліку The Hill, былі пазбаўлены ўласных сталоў у прэс-цэнтры Пентагона. Іх замянілі прадстаўнікамі выданняў, што сімпатызуюць Трампу і Хэгсэту.

У маі Хэгсэт забараніў журналістам хадзіць без суправаджэння па большасці калідораў Пентагона. The Hill адзначае, што сакрэтныя закрытыя зоны ў Пентагоне былі заўсёды, але там, дзе не забаронена, журналісты дзесяцігоддзямі хадзілі свабодна.

• 3
• 1
• 0
• 2
• 1
• 0
• 0
• 0