«Такая бліскучая аперацыя, ашукалі самога Трампа: парвалі нам пашпарты, — іранізуе прафсаюзны лідар Аляксандр Ярашук. — Але мы вернемся ў Беларусь пераможцамі, нягледзячы на тыя парваныя пашпарты».
Сілы нам надавала адчуванне, што мы працягваем слаўную шматвекавую гісторыю беларускага народа, сказаў ён.
74-гадовы прафсаюзны лідар назваў калонію ў Шклове, дзе яго ўтрымлівалі, «фабрыкай катаванняў». Ён абвінаваціў начальніка гэтай калоніі палкоўніка Карніенку ў наўмыснай арганізацыі гэтых катаванняў.
Ярашук таксама сказаў, што назіраў: гэтыя сілавікі і кагэбісты, якія ім займаліся, насамрэч страшна баяцца і хаваюць твары пад маскамі.
«Я зразумеў, што яны, насамрэч, баяцца. Яны баяцца, таму што, калі мы ехалі ўчора з гэтымі кадэбэшнікамі, калі мы былі на сваіх зонах, у сваіх турмах. […] Я бачыў увесь час: і ў зоне, і ў турме, і ўчора — толькі маскі, маскі, маскі! Ні аднаго твара. Хто гаспадар у краіне? Давайце спытаем сябе. Яны гаспадары? А чаго ж яны баяцца?
Таму што яны ведаюць, што яны сёння, насамрэч, апантаныя страхам. Яны ведаюць, што рана ці позна за ўсё прыйдзецца адказваць. І ў тым ліку за тыя пашпарты, якія яны скралі.
Напэўна, Лукашэнка іх узнагародзіць за такую бліскучую аперацыю над намі, вось што яны ашукалі не толькі нас, але і Трампа, і Злучаныя Штаты, і Еўрапейскі Саюз. Ну, дзякуем, хай надалей працягваюць.
Мы зараз тут, мы пазбаўленыя грамадзянства, мы не можам вярнуцца ў Беларусь. Але я хачу вас запэўніць: мы туды прыйдзем! Мы прыйдзем туды, таму што мы сапраўдныя гаспадары нашай краіны, нашай любай Беларусі! І дзеля яе не пашкадуем нічога, і свайго ўласнага жыцця».
Аляксандр Ярашук да арышту быў старшынёй Беларускага кангрэсу дэмакратычных прафсаюзаў.
Ён нарадзіўся ў Камянецкім раёне і да пачатку 2000-х працаваў на розных пасадах, звязаных з сельскай гаспадаркай: загадчыкам аддзела аграрнай палітыкі ЦК КПБ, намеснікам начальніка галоўнага ўпраўлення Міністэрства сельскай гаспадаркі і харчавання, першым намеснікам старшыні Мінскага аблвыканкама, старшынёй абласнога камітэта прыродных рэсурсаў.
З 1999 года ўзначальваў прафсаюз работнікаў АПК у складзе ФПБ. У 2001 годзе спрабаваў балатавацца на прэзідэнта, але не быў зарэгістраваны.
19 красавіка 2022 года дома ў Ярашука і на ягонай працы прайшлі вобшукі, яго затрымалі і змясцілі ў СІЗА. Спачатку прафсаюзнага дзеяча абвінавацілі па арт. 342 КК (групавыя дзеянні, што парушаюць грамадскі парадак), пазней — па арт. 361 (заклікі да санкцый).
20—26 снежня 2022 года ў Мінскім гарадскім судзе адбыўся суд, дзе Ярашук атрымаў 4 гады калоніі агульнага рэжыму. У сакавіку 2023 г. яго перавялі ў магілёўскую турму № 4, пасля — у калонію № 17 у Шклове.
Цяпер чытаюць
Стала вядомая асоба рабочага «Беларуськалія», які загінуў пры абрушэнні горнай пароды1
Каментары