Пугачова расказала, як з’язджала з Расіі і хто з Адміністрацыі Пуціна з ёй гаварыў
Ала Пугачова расказала, чаму пасля пачатку вайны не змагла прамаўчаць, як з іх з Галкіным дзяцей здзекваліся ў школе як з «ворагаў» і пра што гаварыла з чыноўнікам з Адміністрацыі Пуціна.
«Я не збіралася з'язджаць», — кажа Ала Пугачова ў інтэрв'ю Кацярыне Гардзеевай і згадвае люты 2022 года.
Калі пачалася поўнамаштабная вайна Расіі супраць Украіны, спявачка знаходзілася ў Маскве, у той час як яе муж Максім Галкін быў за мяжой. Ёй самой трэба было ехаць у Ізраіль на планавае лячэнне.
«Яны мяне проста выратавалі. Таму што там быў доктар, які мне быў патрэбны вельмі-вельмі», — згадвае Пугачова.
Аднак, як толькі яна пакінула Расію, пачалася агрэсіўная кампанія супраць яе. Сітуацыя абвастрылася, калі Максім Галкін адкрыта выступіў супраць вайны. Пачаліся абразы і ціск.
«Ну, раз не падабаецца, пачынаеш думаць, што тут рабіць тады. Мае сябры мне сказалі: «З табою хочуць пагаварыць», — згадвае спявачка і расказвае, што пагадзілася сустрэцца з першым намеснікам кіраўніка Адміністрацыі прэзідэнта Расіі Сяргеем Кірыенкам.
«Ну, Сярожу я ведала. Я заўсёды да яго добра ставілася. Думаю, ну, пайду. Пагаворым, можа, што падкажа», — тлумачыць спявачка. На сустрэчы яна выказала сваё галоўнае абурэнне: «Я незадаволеная ўседазволенасцю (…) у бок нашай сям'і. Я лічу, што гэта дрэнна, таму што яны парэпеціруюць на нас, і я хвалююся за вас».
Кірыенка ў Пугачовай спытаў, ці не збіраецца яна з'язджаць:
«Я кажу: «Ды не. А што мне выязджаць?» Ён кажа: «Так і праўда. Я тут пачытаў… (я гляджу на стале побач усе матэрыялы пра Макса, што ён сказаў, як ён выказаўся). Гэта зразумела, у эмоцыях чалавек. Ён такі адчувальны, ён жа артыст. Так што я не бачу ніякай нагоды вам хвалявацца».
Я кажу: «Ну, пачакайце. Вы б папярэдзілі хаця б, што няма свабоды слова ўжо». Ён кажа: «Не хвалюйцеся, гэта ўсё нармальна».
Праўда, гэтыя словы чыноўніка спявачку не супакоілі:
«Усё, адчуваю, нешта не тое. Вось у паветры нешта вісела. Я нават яго пацалавала. Сказала: «Пакуль, Сярожа». Я ведала, што я ўжо з ім наўрад ці сустрэнуся. І ў мяне проста нейкае пачуццё было, як падазрона, што ўсё так лёгка аказваецца, што ўсё арганізуем, паглядзім, забаронім, не ведаю што. «Жывіце спакойна, вы — наш гонар нацыянальны».
Па словах спявачкі, яна «на крылах» паехала ў госці да Ігара Нікалаева. Там быў таксама і Ігар Круты.
«Я кажу: «Ігарок, слухай, ёсць нармальныя людзі. Вось Кірыенка, я проста ў захапленні. Як ён усё гэта разумее правільна».
Але праз два дні, заўважае спявачка, яе муж атрымаў статус замежнага агента. Сябры, якія арганізавалі сустрэчу з Кірыенкам, яе спрабавалі супакоіць:
«Мае сябры, якія мяне туды прывялі, яны сказалі: «Не думай, не думай, не думай ні пра што, не думай, не думай. Гэта проста няма кантакту. Вось цяпер яшчэ няма такога кантакту з Мінюстам і вось з уладай. Няма такой дамоўленасці па агульным, па адным нейкім меркаванні».
Як згадвае Ала Барысаўна, новы статус Максіма Галкіна стаў нагодай для здзекаў з дзяцей у школе:
«Дзеці — людзі «добрыя», яны пачалі троліць. Ну, вядома, таму што «вы дзеці шпіёнаў, ваш тата замежны агент» і ўсё такое. Ворагі».
Пасля гэтага сям'я прыняла канчатковае рашэнне. «Мы сабралі чамаданы, патэлефанавалі тату, што мы выязджаем. З сабой у нас было 30 тысяч даляраў, якія можна правезці, і з'ехалі ў Ізраіль».
«Скажу шчыра, гэта быў такі востры боль для мяне, што гэта так адбываецца. Я напісала нешта, маўляў, абвясціце мяне таксама замежным агентам. Таму што я не разумею, чаму меркаванне людзей недурных так спыняецца. Таму што я лічу, што ўвогуле ў дзяржаве павінны быць розныя меркаванні. Як ты вырашыш правільна?
Калі ў цябе можа быць толькі адно меркаванне, а іншыя ўсе спыняюцца. Я думала, што можна выказвацца супраць вайны ў краіне, якая вядзе вайну», —
даводзіць спявачка і запэўнівае, што ні яна, ні Максім Галкін не змаглі б прамаўчаць.
«Я б не прамаўчала, таму што мне лепш было б з'ехаць. Вядома, я ведала, чым гэта можа скончыцца. І Максім не прамаўчаў бы. Таму што ёсць такое паняцце, як сумленне. І сумленне, яно даражэйшае за славу, даражэйшае за раскошу, даражэйшае за ўсё. Асабліва ў маім узросце. Ты ж у апошнюю хвіліну будзеш думаць пра тое, што ты зрабіў і як ты ставіўся да людзей».
Каментары
смотрю у нас фанатов подобных персонажей целая куча.
наверное и песенки про "своих мальчиков" нравятся,ее "антивоенные" ребусы и ее лайки всяким лукафашистским певунам ртом?
Ала Барысаўна не такая ўжо і разумная, як думалася