«Такія выпадкі вельмі рэдкія». Прадпрыемства адказала беларусцы, якая знайшла ў марожаным кавалак металу
У тыктоку днямі з’явілася відэа, дзе беларуска паказала кавалак металу, які трапіўся яе дачцэ ў марожаным «Каштан» з лаймам, вырабленым Мінскім халадзільным камбінатам № 2. У каментарах пад відэа хутка адрэагаваў афіцыйны акаўнт прадпрыемства, піша Telegraf.news.
У першым каментары прадстаўнікі камбіната папрасілі прабачэння за тое, што спажывец знайшоў у прадукце старонні прадмет. Яны адзначылі, што такія выпадкі здараюцца вельмі рэдка, аднак завод сур’ёзна ставіцца да пытання кантролю якасці і ўжо праводзіць праверку, каб выключыць падобнае ў будучыні. Таксама яны падзякавалі за зварот і прапанавалі звязацца непасрэдна для вырашэння пытання.
Аўтарка відэа ў адказ напісала, што чакае афіцыйнага адказу на сваю электронную пошту. Пасля гэтага з акаўнта камбіната з’явіўся яшчэ адзін каментарый: у ім адзначалася, што жанчына ўжывала занадта грубую і нецэнзурную лексіку, а канфліктныя сітуацыі трэба вырашаць больш карэктна.
Гэта абурыла аўтарку скаргі яшчэ больш. Яна падкрэсліла, што такі выпадак мог скончыцца трагедыяй, і замест таго, каб рабіць заўвагі на адрас яе эмоцый, завод мусіў бы засяродзіцца на сур’ёзнасці сітуацыі.
Прадстаўнікі халадзільнага камбіната яшчэ раз падкрэслілі, што ўсведамляюць небяспеку і нясуць адказнасць, але прызналі, што падобныя выпадкі, на жаль, бываюць некантраляваныя. Яны паўтарылі, што ўсё абсталяванне правяраецца, і яшчэ раз адзначылі: «такое здараецца вельмі рэдка». Афіцыйны ліст-скаргу яны атрымалі і на яго абавязкова дадуць адказ, а таксама прымуць адпаведныя меры.
Таксама прадстаўнікі камбіната адказалі і іншым карыстальнікам TikTok, якія ў каментарах выказвалі абурэнне з нагоды інцыдэнту.
Каментары