Ізраіль у сераду атакаваў дронам уваход у будынак сірыйскага Генштаба ў Дамаску на фоне абвастрэння сітуацыі ў краіне.
Ізраільская армія заяўляе, што атакуе ўрадавыя войскі дзеля абароны друзскай меншасці ў Сірыі. У сутыкненнях друзаў і бедуінаў і наступнай атацы сірыйскіх вайскоўцаў ужо загінулі больш за 200 чалавек, паведамляе Расійская служба Радыё Свабода.
Напярэдадні сірыйскія вайскоўцы ўвайшлі ў горад Эс-Сувайда на поўдні краіны, дзе адбыліся сутыкненні паміж друзамі і бедуінамі. У выніку сутыкненняў, паводле даных сірыйскага міністэрства ўнутраных спраў, загінулі больш за 30 чалавек і каля 100 атрымалі раненні.
Пасля ўводу войскаў колькасць загінулых павялічылася да 248, перадае Сірыйская абсерваторыя па правах чалавека. Адзін з лідараў друскага меншасці шэйх Хікмат аль-Хаджры абвінаваціў урад Сірыі ў парушэнні перамір'я і бамбардзіроўцы горада. Сірыйскія вайскоўцы заяўляюць, што адкрываюць толькі агонь у адказ.
Армія абароны Ізраіля ў аўторак нанесла ўдары па сірыйскіх вайскоўцах у раёне Эс-Сувайды. У заяве вайскоўцаў гаварылася, што Ізраіль «прыхільны справе прадухілення прычынення шкоды друзам» у Сірыі з-за «глыбокага братэрскага саюзу з нашымі друзскімі суграмадзянамі ў Ізраілі».
У сераду ізраільскія вайскоўцы задзейнічаны ў сутыкненнях на мяжы анексаваных Ізраілем Галанскіх вышынь і Сірыі. Паведамляецца, што дзясяткі друзаў спрабуюць прарвацца на кантраляваную Ізраілем тэрыторыю, адначасова сотні друзаў, што жывуць на Галанах, спрабуюць трапіць у зваротным кірунку, пратэстуючы супраць дзеянняў сірыйскіх уладаў.
Ізраільскія вайскоўцы выкарысталі слезацечны газ, каб адцесніць друзаў, што жывуць на тэрыторыі анэксаванага рэгіёна, каб тыя не прарваліся ў Сірыю.
Цяпер чытаюць
З Міністэрства культуры звольнілі першага намесніка Маркава3
Каментары