У многіх беларусаў, якія пераехалі за мяжу, рана ці позна можа ўзнікнуць неабходнасць аформіць так званы «пашпарт PP», піша Tochka.by.
Раней гэта быў асобны дакумент. Цяпер — проста штамп у звычайным пашпарце, але назва захавалася ў народзе.
Ён ставіцца тым, хто ва ўстаноўленым парадку аформіў выезд на ПМЖ у іншую краіну.
Журналіст Tochka.by даведаўся некаторыя нюансы ў беларускі, якая перабралася ў Польшчу і праз час зрабіла так званы «пашпарт PP».
Жыць у Польшчы з ДНЖ можна і са звычайным беларускім пашпартам, але пячаць, якая пацвярджае знаходжанне за мяжой, дае пэўныя перавагі.
Ёсць два варыянты афармлення «пашпарта PP»: праз пасольства/консульства Беларусі ў іншай дзяржаве або на радзіме ў аддзеле грамадзянства і міграцыі па месцы рэгістрацыі (былы інстытут прапіскі).
Праз дыппрадстаўніцтва рабіць даўжэй (да чатырох месяцаў + чарга на запіс) і даражэй (€200 згодна з прэйскурантам).
Вольга (імя зменена) падала дакументы на афармленне падчас адной з паездак дадому. У Беларусі паслуга каштуе 10 базавых велічынь (на сёння 420 рублёў). І робяць гэта не больш за два месяцы.
Для дзяцей да 14 гадоў, дарэчы, афармленне ўсюды бясплатнае. Але зрабіць «пашпарт РР» толькі дзіцяці нельга: трэба, каб такі быў і ў кагосьці з бацькоў.
Калі з непаўналетнім вяртаецца толькі маці або бацька, то патрабуецца згода другога з бацькоў (можна напісаць па факце звароту ад рукі, у тым ліку ў пасольстве, або прынесці аформленае ў беларускага натарыуса).
Суразмоўніцы даслалі апавяшчэнне аб гатоўнасці на адрас пражывання ўжо праз месяц, і яна забрала дакумент падчас чарговага наведвання Беларусі.
У дзяўчыны ёсць тлумачэнне, чаму ёй усё зрабілі ў два разы хутчэй. Дзяржорганы правяраюць грамадзян на прадмет даўгоў (падаткі, штрафы, «камуналка», аліменты).
Ведаючы пра гэта, беларуска загадзя з'ездзіла ў падатковую па месцы жыхарства, даведалася, ці няма за ёй такіх абавязацельстваў, і папярэдзіла, што прыйдзе запыт з «пашпартнага стала». Гэта значыць тут ужо былі гатовыя даць адказ.
У Беларусі ў пашпарце адзначаюць, што грамадзянін выбыў на пастаяннае месца жыхарства ў канкрэтную краіну. А ўжо на новым месцы ў дыппрадстаўніцтве ставяць той самы штамп і, адпаведна, на консульскі ўлік.
У чым перавагі «пашпарта PP»?
Галоўная прычына, па якой Вольга зрабіла штамп, — магчымасць уязджаць у Беларусь на асабістым аўто з польскімі нумарамі. Гэта зручна.
Як вядома, па існуючых правілах трэба ўносіць заклад у рублях па курсе еўра ў дзень перасячэння мяжы. Вярнуць яго могуць не адразу па факце вяртання і на беларускую карту. Важна таксама, каб той, хто ўязджае, быў уладальнікам машыны. Яшчэ пры афіцыйным пражыванні за мяжой у Беларусі грамадзяніна не будуць лічыць «дармаедам».
Пры атрыманні «пашпарта PP» мужчын і ваеннаабавязаных жанчын здымаюць з воінскага ўліку, гэта значыць па ўважлівай прычыне яны не могуць быць прызваныя на вайсковую службу (да 27 гадоў) або выкліканыя на зборы.
Магчымасць стаць на консульскі ўлік у дзяржаве пражывання ў перспектыве дазваляе вырашаць тэрміновыя пытанні без прыезду на радзіму.
Зрэшты, для абмену беларускага пашпарта, у якога скончыўся тэрмін дзеяння, вярнуцца ўсё ж давядзецца. Гэтае правіла ўвялі з верасня 2023 года.
Якія недахопы звязаныя з «пашпартам PP»?
Трэба разумець, што «пашпарт PP» прыносіць і пэўныя складанасці.
Чалавека выпісваюць з кватэры (дома) у Беларусі. Ён захоўвае права валодання, калі з'яўляецца ўласнікам жылля, але не можа афармляць здзелкі, напрыклад, прадаць (патрэбна часовая рэгістрацыя або даверанасць на іншага, аформленая ў Беларусі).
Для Вольгі гэта не з'яўляецца істотным, паколькі ў яе няма нерухомасці на радзіме. З адсутнасцю рэгістрацыі беларусы таксама губляюць магчымасць бясплатна абслугоўвацца ў айчынных паліклініках і бальніцах.
Але калі чалавек пераязджае на новае месца жыхарства і ўладкоўваецца ў іншай краіне, у гэтым, па сутнасці, няма асаблівай неабходнасці.
Цяпер чытаюць
У 55 гадоў памёр стваральнік брэнду Serge Сяргей Атрошчанка10
Каментары