У Еўрасаюзе патрабуюць пакараць Беларусь і Расію за перашкоды спадарожнікавай навігацыі
13 краін Еўрапейскага Саюза, у тым ліку Літва, Латвія, Эстонія, Германія і іншыя, заклікалі Еўракамісію тэрмінова прыняць меры ў адказ на перашкоды ў працы спадарожнікавай навігацыі (GNSS), якія, паводле іх, паходзяць з тэрыторый Расіі і Беларусі. Ініцыятыву ўзначаліў міністр транспарту Літвы Эўгеніюс Сабуціс.
У супольным звароце міністры адзначаюць, што гаворка ідзе не пра выпадковыя збоі, а пра свядомыя гібрыдныя атакі, якія пагражаюць важным галінам — транспарту, энергетыцы і сувязі. Асабліва небяспечныя яны для авіяцыі і суднаходства.
Міністры прапануюць:
- узмацніць кантроль над радыёсігналамі;
- палепшыць каардынацыю паміж цывільнымі і вайсковымі структурамі;
- хутчэй упарадкаваць і пашырыць абароненыя функцыі сістэмы «Galileo»;
- мадэрнізаваць традыцыйную навігацыйную інфраструктуру.
Акрамя тэхнічных мер, яны заклікаюць узмацніць дыпламатычны ціск і разглядаць магчымасць юрыдычнай адказнасці для тых, хто стаіць за перашкодамі.
Праблема з навігацыяй у балтыйскім рэгіёне назіраецца з 2022 года і стала адной з галоўных тэм нядаўняй сустрэчы Рады ЕС у Люксембургу.
СМІ неаднаразова паведамлялі пра збоі GPS у краінах, што мяжуюць з Расіяй і Беларуссю, прычынай якіх называюць дзейнасць расійскіх сістэм радыёэлектроннай барацьбы ў Калінінградскай вобласці.
Цяпер чытаюць
Стала вядома, што за 200 тысяч еўра прапаноўвалі Сяргею Ціханоўскаму «беларускія бізнэсмены»27
Каментары