Ёзэф Мігаш зноў стане паслом Славакіі ў Беларусі, паведамілі ў дэпартаменце камунікацый Міністэрства замежных спраў Славакіі інфармацыйнаму агенцтву TASR.
«Славацкая Рэспубліка зацікаўлена ў практычным супрацоўніцтве з кожнай краінай свету. Таму мы хочам аднавіць канструктыўны дыялог з беларусамі як на двухбаковым, так і на шматбаковым узроўні, бо сёння неабходна даць прастору дыпламатыі, дыялогу і перамоўнаму працэсу, каб дасягнуць першых вынікаў, напрыклад, у надзвычай важным мірным перамоўным працэсе і як мага ранейшым завяршэнні вайны ва Украіне», — сказаў міністр замежных спраў Юрай Бланар.
У міністэрстве заявілі, што Беларусь з’яўляецца эканамічным і палітычным партнёрам у Цэнтральнай і Усходняй Еўропе. «Паступова Славакія можа развіваць базавае супрацоўніцтва ў гандлі, сельскай гаспадарцы, культуры і адукацыі», — дадалі ў міністэрстве.
Мігаш заявіў, што пасольства Славакіі таксама будзе працягваць аказваць якасныя консульскія паслугі грамадзянам Славакіі ў Беларусі. «Сёння мы таксама назіраем павышаную зацікаўленасць з боку грамадзян Беларусі ў навучанні ў славацкіх універсітэтах. Каля 10 000 беларусаў пражываюць у Славакіі, і яны з’яўляюцца мостам узаемаразумення паміж нашымі дзвюма нацыямі», — адзначыў Мігаш.
Мігаш быў паслом у Беларусі ў 2016-2020 гадах. 9 мая 2020 года, нягледзячы на распаўсюджванне COVID-19 у Беларусі, Мігаш браў удзел ва ўрачыстасцях у Мінску з нагоды Дня Перамогі.
У МЗС Славакіі палічылі, што пасол парушыў прынцыпы камунікацыі са штаб-кватэрай, не раскрыўшы свайго намеру. У выніку Ёзэф Мігаш падаў у адстаўку, якая была прынята.
Пазней Аляксандр Лукашэнка назваў тое, што адбылося, міжнародным скандалам, а яшчэ пазней Мігаш быў узнагароджаны ордэнам Скарыны.
-
Жанчыну-пульманолага з 30-гадовым стажам адправілі ў калонію па трох палітычных артыкулах
-
Верагоднай прычынай для прыезду Дэрула ў Мінск сталі здымкі для рэкламы катэджаў
-
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце
Цяпер чытаюць
Жанчыну-пульманолага з 30-гадовым стажам адправілі ў калонію па трох палітычных артыкулах9
Каментары