У канклаве, які распачнецца 7 мая ў Сікстынскай капэле, змогуць узяць удзел 135 з 252 кардыналаў. 117 членам Калегіі кардыналаў ужо споўнілася 80 гадоў і яны страцілі права голасу пры выбары Папы, паведамляюць Навіны Ватыкана.
Найбуйнейшую групу кардыналаў-выбаршчыкаў складаюць еўрапейцы — 53 іерархі. 37 кардыналаў будуць прадстаўляць Амерыку (16 — Паўночную, 4 — Цэнтральную і 17 — Паўднёвую), 23 — Азію, 18 — Афрыку і 4 — Акіянію.
Кардыналы-выбаршчыкі паходзяць з 71 краіны свету: 18 краін Еўропы, 17 — Афрыкі, 17 — Азіі, 15 — Амерыкі і 4 — Акіяніі.
У Еўропе найбуйнейшую групу прадстаўляюць італьянцы — 17 кардыналаў з правам голасу на канклаве. Па 5 кардыналаў прадстаўляюць Францыю і Іспанію, па 4 — Партугалію і Польшчу, па 3 — Вялікабрытанію і Германію, 2 — Швейцарыю, па адным — Бельгію, Боснію і Герцагавіну, Венгрыю, Літву, Люксембург, Мальту, Нідэрланды, Сербію, Харватыю і Швецыю.
З 37 амерыканскіх кардыналаў 10 прадстаўляюць ЗША, 7 — Бразілію, па 4 — Аргенціну і Канаду, 2 — Мексіку, па адным — Гаіці, Гватэмалу, Калумбію, Кубу, Нікарагуа, Парагвай, Перу, Чылі, Уругвай і Эквадор.
Сярод 23 азіяцкіх кардыналаў-выбаршчыкаў — 4 з Індыі, 3 — з Філіпін, 2 — з Японіі, па адным — з Паўднёвай Карэі, Кітая, Іерусаліма, Інданезіі, Ірана, Ірака, Манголіі, Малайзіі, М’янмы, Пакістана, Сінгапура, Тайланда, Шры-Ланкі, Усходняга Тымора.
З 18 афрыканскіх краін, прадстаўленых на канклаве, Кот-д’Івуар мае 2 кардыналы-выбаршчыкі, па адным — Алжыр, Буркіна-Фасо, Гана, Гвінея, Дэмакратычная Рэспубліка Конга, Каба-Вердэ, Кенія, Мадагаскар, Марока, Нігерыя, Паўднёва-Афрыканская Рэспубліка, Паўднёвы Судан, Руанда, Танзанія, Цэнтральна-Афрыканская Рэспубліка і Эфіопія.
У кожнай з чатырох краін Акіяніі, прадстаўленых на канклаве (Аўстралія, Новая Зеландыя, Папуа-Новая Гвінея і Тонга) — па адным кардынале.
Упершыню ў гісторыі выбіраць Папу будуць кардыналы родам з Гаіці, Каба-Вердэ, Люксембурга, Малайзіі, Папуа-Новай Гвінеі, Парагвая, Паўднёвага Судана, Сербіі, Сінгапура, Швецыі, Усходняга Тымора і Цэнтральна-Афрыканскай Рэспублікі.
Самы малады кардынал на канклаве — 45-гадовы грэка-каталіцкі іерарх украінскага паходжання Мікола Бычок з Аўстраліі, а самы пажылы — 79-гадовы іспанец Карлас Асора Сьера, арцыбіскуп-эмерыт Мадрыдскі.
Выбіраць новага Папу будуць 5 кардыналаў, прызначаных Янам Паўлам ІІ, 22 — Бенедыктам XVI, 108 — Францішкам.
33 кардыналы-выбаршчыкі належаць да 18 манаскіх супольнасцей. Сярод іх — 5 да Таварыства святога Францішка Сальскага (салезіяне), па 4 — да Ордэна меншых братоў і Таварыства Езуса (езуіты), 3 — да Ордэна меншых братоў канвентуальных, па 2 — да рэдэмптарыстаў і вербістаў, па адным — да іншых ордэнаў і кангрэгацый.
Што вядома пра віцебчука, якога вінавацяць у спробе падрыву самалёта ў Германіі12
Каментары