На Польшчу — да 15 гадзін, у Літву — без чэргаў. Чаго чакаць пасажырам аўтобусаў на мяжы?
Вялікія выходныя, як і чакалася, выклікалі ўсплёск попыту на паездкі, у тым ліку міжнародныя. Гэта адбілася і на сітуацыі на мяжы, піша Newgrodno.by.
Напрыклад, на польскім напрамку ў «чарзе» да 10:00 суботы стаяла каля 60 аўтобусаў.
«Сярэдні час чакання ў чарзе і праходжання мяжы складзе каля 15 гадзін», — адзначаюць перавозчыкі. Варта адзначыць, што гэта не канчатковы тэрмін, час можа змяняцца ў залежнасці ад розных фактараў.
Перавозчыкі робяць усё магчымае, каб не сарваць расклад, але паўплываць на чэргі яны, вядома, не ў сілах.
У бок Літвы чэргаў з аўтобусаў няма. Сярэдні час праходжання мяжы ў гэтым выпадку складае 2—3 гадзіны. Аўтобусы ідуць дакладна па раскладзе. Праўда, вадзіцелі нагадваюць пасажырам пра ўзмоцнены кантроль з боку літоўскіх службаў. Пад забарону на ўвоз з Беларусі трапілі больш за 2800 тавараў, у тым ліку прадукты харчавання. Калі ў аднаго з пасажыраў знойдуць «забаронку», могуць затрымаць увесь аўтобус.
Проста цяпер, напрыклад, квіткі на Польшчу можна купіць амаль што на дзень у дзень. А вось паездку да Вільні трэба планаваць загадзя — на бліжэйшыя рэйсы ўсе квіткі раскуплены.
Цяпер зрабіць гэта прасцей. Калі раней продаж пачынаўся за 30—60 дзён да адпраўлення аўтобуса, то цяпер можна купіць квіткі на многія рэйсы ў Польшчу, Літву і Расію ажно да 31 жніўня.
А што з коштам?
Кошт квіткоў застаецца на ранейшым узроўні. Перавозчыкі адзначаюць, што перадумоў для падаражання пакуль няма. Але ўсё ж лепш паклапаціцца пра куплю загадзя — гэта гарантыя таго, што паездка нават у жніўні адбудзецца па вясновай цане.
Каментары