Святы Пасад прадставіў праект магілы Папы Францішка. Яна будзе размешчана ў Базіліцы Санта-Марыя-Маджорэ, адной з чатырох галоўных папскіх базілік Рыма, пішуць Навіны Ватыкана.
Магіла выраблена з мармуру лігурыйскага паходжання. На ёй будзе толькі адзін надпіс — «Franciscus», а таксама рэпрадукцыя нагруднага крыжа пантыфіка. Такое простае афармленне адлюстроўвае сціпласць, якая характарызуе служэнне Папы.
Дакладнае месца магілы — ніша бакавога нефа базілікі, размешчаная паміж Паўлінскай капліцай (вядомай таксама як Капліца «Salus Populi Romani») і капліцай Сфорца.
Магіла будзе знаходзіцца побач з алтаром святога Францішка, што мае сімвалічнае значэнне, улічваючы, што менавіта ў гонар гэтага святога Хорхэ Марыа Берголья абраў сваё папскае імя.
Выбар базілікі Санта-Марыя-Маджорэ для месца пахавання Папы Францішка адрозніваецца ад традыцыйнага месца пахавання пантыфікаў у крыпце Базілікі Святога Пятра ў Ватыкане і адлюстроўвае асабістае пажаданне пантыфіка і яго глыбокую пашану да Божай Маці.
Нагадаем, што пахаванне Папы Францішка пройдзе раніцай у суботу.
Ад Беларусі на пахаванне Папы Рымскага паедзе Ігар Сергеенка
Ватыкан запрасіў Святлану Ціханоўскую на пахаванне Папы Францішка
У Ватыкане пачалося развітанне з Папам Францішкам
У спісе магчымых Папаў дадаўся і кардынал, які наведваў беларускіх палітвязняў
«З адзіным надпісам: Franciscus». Ватыкан апублікаваў завяшчанне памерлага Папы
Каментары