Мядзведзь, якога пабачылі два гады таму на Палессі, здаецца, там і пасяліўся
Бураму мядзведзю, чыё з'яўленне ў Нацыянальным парку «Прыпяцкі» пасля больш чым 40-гадовай адсутнасці стала ў 2023 годзе нечаканасцю, выглядае, гэтыя месцы спадабаліся. Фотапастка зафіксавала драпежніка тут зноў 20 сакавіка, што можа сведчыць пра ягоную зімоўку на тэрыторыі парку, паведамляецца на сайце нацпарку.
Першае за доўгія гады з'яўленне мядзведзя ў «Прыпяцкім» навукоўцы зарэгістравалі ў верасні 2023 года. Да гэтага апошні раз яго бачылі тут толькі аднойчы — у 1981 годзе.
Вяртанне драпежніка выклікала вялікую цікавасць у навуковай супольнасці. Тады мядзведзь адзначыўся візітам на пчальнік каля вёскі Славінск Петрыкаўскага раёна, дзе паласаваўся мёдам.
У 2024 годзе восеньскія «візіты» мядзведзяў пачасціліся. Яны шкодзілі пчальнікам у ваколіцах вёсак Таргошын і Снядзін Петрыкаўскага і Хлупін, Перароў ды Перароўскі Млынок Жыткавіцкага. Аднак гэтыя заходы лічыліся транзітнымі, гэта значыць у пошуках ежы.
У той жа час яшчэ ў сакавіку мінулага года мясцовыя жыхары паведамлялі пра свежыя сляды, уключаючы экскрэменты ў журавінавым балоце і сляды кіпцюроў на хвоі з дзікімі пчоламі. Але тады пацвярджэння зімоўкі мядзведзя не было.
Цяпер жа, дзякуючы фотапастцы, у навуковых супрацоўнікаў з'явілася магчымасць не толькі пацвердзіць факт зімоўкі, але і правесці маніторынг меркаванага месца жыцця мядзведзя і сабраць больш інфармацыі пра ягонае жыццё ў парку.
Гэта адкрыццё дало надзею навукоўцам на аднаўленне папуляцыі бурага мядзведзя ў рэгіёне.
Гурт «Дразды» пакідае сцэну і вінаваціць у гэтым «гіперактыўных блогераў»5
Каментары