Стала вядома, хто тая грамадзянка ЗША, якую нядаўна вызваліў Лукашэнка

Як расказаў «Люстэрку» Belpol, Анастасія Нюфер — ураджэнка Беларусі. Яна нарадзілася ў Мінску ў 1977 годзе, цяпер ёй 48 гадоў. Дзявочае прозвішча жанчыны — Ражкова.

Анастасія двойчы была замужам. Паводле даных аналітычна-расследвальніцкай групы Digital Intelligence Team (DIT), у 1999 годзе Анастасія выйшла замуж за грамадзяніна ЗША Рэя Патнэма і ўзяла прозвішча мужа. У 2005-м яна атрымала амерыканскае грамадзянства. У профілі Анастасіі ў фэйсбуку па-ранейшаму пазначана прозвішча Патнэм.

У 2013 годзе Анастасія выйшла замуж другі раз за Шэлдана Нюфера, таксама грамадзяніна ЗША. У жанчыны ёсць двое сыноў-двайнят — Аляксандр і Шон. Хлопцам ужо па 22 гады, і яны таксама носяць прозвішча Патнэм.

Паводле даных публічнага амерыканскага сэрвісу пошуку людзей, сыны жывуць з маці ў горадзе Ален, штат Тэхас.

Павялічыць

Мяркуючы па здымках у Google Maps, Анастасія і яе сыны жывуць у нядрэнным асабняку. На адным з сайтаў пошуку нерухомасці ў ЗША пазначана, што ён быў пабудаваны ў 1999 годзе, у ім чатыры спальні, тры ванныя пакоі. Дом ацэнены ў 542 500 даляраў, але па стане на сёння ён не прадаецца.

Аналітыкі DIT знайшлі на старонцы жанчыны ў фэйсбуку запіс ад 15 сакавіка 2022 года, у якім Анастасія паведамляе пра атрыманне сертыфіката адміністратара воблачных сэрвісаў Microsoft Azure.

«Было нялёгка засяродзіцца на вучобе ў святле падзей у маёй роднай краіне, якія непасрэдна тычыліся мяне і маёй сям'і, але я справілася», — пісала тады Анастасія. Ці працуе яна ў IT, невядома.

Жанчына захапляецца сабакамі. На яе старонцы ў інстаграме пазначана, што яна прафесійна даглядае свойскіх жывёл.

«Першакласныя паслугі пансіяната ў Ален, штат Тэхас. Ствараю дом для вашых пухнатых сяброў», — паведамляецца ў апісанні яе старонкі.

Мяркуючы па старонцы ў фэйсбуку, Анастасія перыядычна прыязджала ў Беларусь і сустракалася са сваякамі. У пачатку 2024 года ў суполцы беларусаў у ЗША гэтай сацыяльнай сеткі Анастасія расказвала, што паведаміла ў аддзел грамадзянства і міграцыі Кастрычніцкага РУУС Мінска пра наяўнасць у яе амерыканскага грамадзянства. Дарэчы, апошні пост на фэйсбук-старонцы Анастасіі быў зроблены 7 снежня 2024 года.

Амерыканскае інфармацыйнае агенцтва Associated Press са спасылкай на Дзяржаўны дэпартамент ЗША паведаміла, што Нюфер была затрыманая ў Беларусі ў пачатку снежня 2024 года. Афіцыйна прычына не названая, але ананімны былы высокапастаўлены беларускі дыпламат расказаў АР, што гэта звязана з пратэстамі 2020 года.

Крыніца, якая гаварыла на ўмовах ананімнасці з-за праблем бяспекі, сказала, што Лукашэнка сам прапанаваў вызваліць грамадзянку ЗША «ў якасці жэсту добрай волі», адмовіўшыся пры гэтым адпускаць любых беларускіх апазіцыянераў і праваабаронцаў.

• 14
• 0
• 0
• 6
• 1
• 1
• 0
• 1