«Сірыя паказвае, што Расія не непераможная». Галоўная дыпламатка ЕС выказалася супраць перамоў на ўмовах Масквы
Вярхоўная прадстаўніца Еўрасаюза па замежных справах і палітыцы бяспекі Кая Калас папярэдзіла, што падштурхоўванне Украіны да як мага хутчэйшых перамоў з Расіяй аб спыненні амаль трохгадовай вайны можа прывесці да «кепскага пагаднення» для Кіева. Гэтыя словы прагучалі на фоне заклікаў да хуткага ўрэгулявання канфлікту, якія гучаць у Еўропе і свеце, паведамляе Euronews.
Галоўная дыпламатка ЕС выступіла з каментарамі ў чацвер раніцай, перад тым як адправіцца на саміт лідараў Еўрапейскага саюза. Яго ключавая тэма — падтрымка Украіны, якая супрацьстаіць расійскай агрэсіі.
«Любое падштурхоўванне да заўчасных перамоў будзе кепскім пагадненнем для Украіны, — сказала Калас журналістам у Бруселі. — Усе астатнія гульцы ў свеце ўважліва сочаць за тым, як мы дзейнічаем у гэтым выпадку, і таму нам сапраўды трэба быць моцнымі».
«Сірыя паказвае нам, што Расія не з'яўляецца непераможнай, і мы не павінны недаацэньваць сваю ўласную сілу», — дадала Калас, маючы на ўвазе нядаўні крах рэжыму Башара Асада, галоўнай апорай якога быў Крэмль.
Кая Калас узначаліла дыпламатыю Еўрасаюза зусім нядаўна, 1 снежня 2024 года, змяніўшы на пасадзе Жазэпа Барэля. Перад тым са студзеня 2021 года па ліпень 2024-га яна была прэм'ер-міністаркай Эстоніі.
Падобную да Калас думку выказаў і прэзідэнт Літвы Гітанас Наўседа, заявіўшы, што Расія не праяўляе гатоўнасці да перамоваў, а таму любыя спробы абмеркавання іх контрпрадуктыўныя.
«Я ў курсе пэўных чутак пра перамовы, але маё меркаванне такое, што, верагодна, гэта яшчэ занадта рана, таму што цяпер Расія знаходзіцца ў наступальнай пазіцыі, — сказаў Наўседа. — Калі мы паспрабуем нешта зрабіць у гэтай сітуацыі, гэта не прывядзе да справядлівага і трываламу міру. Гэта будзе несправядлівы і няўстойлівы мір».
На думку Наўседы, ЕС павінен выйсці за рамкі «рытарычных» абяцанняў і замест гэтага засяродзіцца на ўзмацненні вайсковай і фінансавай падтрымкі Украіны, каб паставіць краіну ў максімальна моцнае становішча перад пачаткам любых перамоў.
«На жаль, мы не выконваем абяцанняў, — наракае ён. — Шмат абяцанняў, але не так шмат абяцанняў, якія мы маглі б выканаць».
«Сітуацыя сапраўды складаная, і мы павінны быць сумленнымі з самімі сабой, — працягвае ён. — Мы павінны стаць сапраўды глабальным стратэгічным гульцом. І мы зможам стаць такім гульцом толькі ў тым выпадку, калі будзем прымаць рашэнні, а не толькі гаварыць, гаварыць і гаварыць».
У Еўрасаюзе абмяркоўваюць адпраўку ва Украіну да 100 тысяч вайскоўцаў
Чаму Лукашэнка хоча ўзяць удзел у перамовах па Украіне і якіх гарантый бяспекі папросіць?
Зяленскі выключыў замарозку вайны для перамоваў з Расіяй пасля прыходу Трампа да ўлады
Вольга Карач: На мірных перамовах Беларусь павінен прадстаўляць Пазняк. А Ціханоўская слабая
Украінскае МЗС паведаміла, на якія перамовы і гарантыі Мінск мае права прэтэндаваць
Прэзідэнт Славакіі Пелегрыні: Украіне прыйдзецца страціць некаторыя тэрыторыі дзеля міру
Цяпер чытаюць
«Упэўнены, ён і з канём каля аркі пагаварыў». Расійскі журналіст апісаў прыезд Лукашэнкі на парад7
Каментары