У Расіі вагнеравец забіў двух чалавек, пайшоў на вайну, вярнуўся і напаў з нажом на жанчыну. Але судзіць яго не будуць
Ён заключыў кантракт і зноў вяртаецца на фронт.
У Расіі не будуць судзіць наёмніка ПВК «Вагнер» Аляксея Патрушава, які ў Чыце спрабаваў зарэзаць мясцовую жыхарку. Суд адмяніў арышт абвінавачанага, бо ён заключыў кантракт з Міністэрствам абароны і мае намер адправіцца на вайну. Норма, якая дазваляе адпускаць падсудных па крымінальных справах у войска, пачала дзейнічаць у Расіі з 2 кастрычніка.
Паводле закона, вытворчасць па крымінальнай справе супраць падсудных, якія заключылі кантракт з Міністэрствам абароны, прыпыняецца, а мера стрымання адмяняецца, паведамляе «Сібір. Рэаліі».
Патрушаў у красавіку 2024 года напаў на жанчыну, якая сядзела ў прыпаркаваным аўтамабілі, і некалькі разоў ударыў яе нажом у грудзі, жывот, рукі і ногі, а затым паспрабаваў угнаць аўтамабіль. Паводле следства, у момант нападу ён быў п'яны. Жанчына выжыла, але атрымала сур'ёзныя раненні. Сам абвінавачаны сваёй віны не прызнаў і растлумачыў, што падышоў да жанчыны на яе крыкі аб дапамозе.
Гэта далёка не першае сур'ёзнае злачынства Патрушава. У 2014 годзе ён быў асуджаны на 23 гады калоніі за двайное забойства, згвалтаванне і замах на забойства. Тады ён напаў на гаспадара дома, на якога пакрыўдзіўся падчас застолля, а затым згвалціў яго сужыцельніцу. Пазней ён забіў яшчэ аднаго чалавека. З калоніі Патрушаў быў завербаваны ў ПВК «Вагнер» і адправіўся на вайну ва Украіну.
У верасні расійская Дзярждума прыняла закон, які дазваляе вызваляць ад крымінальнай адказнасці падчас судовага разгляду справы супраць мабілізаваных ці тых, хто заключыў кантракт з Міністэрствам абароны. Калі прысуд ужо ўступіў у сілу, такія асобы вызваляюцца ад пакарання ўмоўна, і кантроль за імі перадаецца камандаванню ваеннай часткі. Пасля атрымання дзяржаўнай узнагароды яны вызваляюцца ад крымінальнай адказнасці або ад прызначанага пакарання, і судзімасць анулюецца.
Цяпер чытаюць
Колькасць судоў па палітычных крыміналках зменшылася ў разы23
Каментары