Найчасцей беларусы пакутуюць ад хвароб органаў дыхання. У мінулым годзе імі перахварэлі больш за 4,5 мільёна разоў. Гэта прыблізна на 375 тысяч менш, чым годам раней, паведамляе Белстат.
У пераліку на 100 тысяч чалавек найчасцей ад хвароб органаў дыхання пакутуюць у Мінску. У мінулым годзе імі хварэлі больш за 57,8 тысяч разоў на 100 тысяч жыхароў сталіцы. Найрэдзей — у Брэсцкай вобласці: больш за 43,1 тысячы на 100 тысяч.
На другім месцы па распаўсюджанасці — траўмы, атручванні і іншыя наступствы знешніх прычын. На іх прыпадае 652 тысячы выпадкаў. У параўнанні з 2022 годам гэты паказчык таксама скараціўся, тады фіксавалі 657,1 тысячы выпадкаў.
У мінулым годзе траўмы і атручванні найчасцей здараліся ў сталіцы — каля 8,5 тысяч выпадкаў на 100 тысяч чалавек. Найменш іх было ў Віцебскай вобласці: больш за 5,1 тысячы выпадкаў на 100 тысяч.
На трэцім месцы па частаце — хваробы касцёва-мышачнай сістэмы і злучальнай тканкі. Тут ідзе гаворка пра 482,2 тысячы выпадкаў у 2023 годзе. У 2022 годзе на гэтую катэгорыю прыпадала 455,6 тысячы выпадкаў. У Мінску фіксавалася 7,6 тысячы выпадкаў на 100 тысяч насельніцтва, што з’яўляецца найвышэйшым паказчыкам па краіне. Найменш іх было ў Магілёўскай вобласці: амаль 2,5 тысячы на 100 тысяч.
Рак у 2023 годзе ўпершыню дыягнаставалі ў больш чым 58 тысяч беларусаў. Годам раней такі дыягназ быў пастаўлены ў 53 тысяч чалавек.
У пераліку на 100 тысяч чалавек рак найчасцей фіксуюць у Гомельскай вобласці — 654,7 выпадка. Найрэдзей — у Брэсцкай вобласці: 604,3 выпадка. У Мінску — 637,5 выпадка на 100 тысяч чалавек.
З 2015 года значна скарацілася колькасць хворых на туберкулёз. У 2023 годзе гэты дыягназ упершыню быў пастаўлены прыкладна 1,3 тысячы чалавек, а ў 2015 годзе — больш за 3,1 тысячы. Найчасцей хваробу фіксуюць у Гомельскай вобласці: 19,4 выпадка на 100 тысяч чалавек. Найрэдзей — у Мінску: 7,3 выпадка.
Цяпер чытаюць
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2727
Каментары