84-гадовы нобелеўскі лаўрэат Мухамад Юнус пагадзіўся ўвайсці ў часовы ўрад Бангладэш
Тым часам сітуацыя ў сталіцы краіны наладжваецца.
Лаўрэат Нобелеўскай прэміі міру 84-гадовы эканаміст Мухамад Юнус пагадзіўся стаць галоўным дарадцам студэнцкага часовага ўрада ў Бангладэш, паведаміла газета The Daily Star.
Мухамед Юнус — лаўрэат Нобелеўскай прэміі міру 2006 года за намаганні па стварэнні эканамічнага і сацыяльнага развіцця, нейкі час быў дарадцам урада Бангладэш.
У 1970-я пасля голаду ў Бангладэш, які забраў жыцці 1,5 млн чалавек, Юнус заснаваў банк Grameen, які выдае мікрасубсідыі пад невысокі працэнт. Яны дазваляюць выжываць шматлікім бангладэшцам: краіна з'яўляецца адной з самых бедных у Азіі. Юнус атрымаў мянушку «банкір для беднякоў». Дзякуючы яму былі выратаваныя сотні тысяч чалавек.
1 студзеня 2024 года суд горада Дака прызнаў Мухамада Юнуса вінаватым у парушэнні працоўнага заканадаўства і прысудзіў яго да шасці месяцаў зняволення і да штрафу паводле двух артыкулаў на агульную суму, эквівалентную 272 далярам ЗША. На перыяд падачы апеляцыі асуджаны быў адпушчаны на волю пад заклад.
Тым часам сітуацыя ў сталіцы Бангладэш вяртаецца ў звыклае рэчышча, жыхарам дазволілі выходзіць на вуліцу.
«Усё наладжваецца. Знялі каменданцкую гадзіну, можна выходзіць з дому», — паведаміла жыхарка Бангладэш Алена карэспандэнту ТАСС.
Пры гэтым, на яе думку, спакой можа быць зманлівым. «Усё ж улады няма. Усё можа быць. Але галоўнае — аэрапорт працуе», — дадала расіянка.
***
Мітынгі ў краіне пачаліся ў канцы чэрвеня, іх удзельнікі (у першую чаргу студэнты) патрабавалі пакласці канец сістэме квот, якая рэзервуе да 30% дзяржаўных пасад для членаў сем'яў ветэранаў, якія змагаліся ў вайне за незалежнасць Бангладэш у 1971 годзе.
Праціўнікі сістэмы назвалі яе дыскрымінацыйнай і лічаць, што яна прыносіць карысць прыхільнікам прэм'ера Шэйх Хасіны, чыя партыя «Авамі ліг» узначаліла рух за незалежнасць у 1970-х.
У выніку на акцыях паўсталі лозунгі з заклікам да адстаўкі Хасіны. На фоне росту напружанасці ў краіне ўвялі каменданцкую гадзіну і адключылі мабільны Інтэрнэт, што прывяло да $10 млрд шкоды эканоміцы краіны.
Паводле звестак NDTV, падчас пратэстаў загінулі звыш 300 чалавек, сярод іх і дэманстранты, і паліцыянты.
76-гадовая Шэйх Хасіна — дачка першага прэм'ера Бангладэш, была ва ўладзе з 2009 года, у студзені гэтага года яе пераабралі на чацвёрты тэрмін, апазіцыя байкатавала выбары. Учора Хасіна з'ехала з краіны, а пратэстоўцы захапілі яе рэзідэнцыю.
«Ведаеце, як каментуе ваша затрыманне апазіцыя? «Арыштаваны памагаты рэжыму». Турэмная споведзь лідара прафсаюзаў Ярашука2
Каментары