Венгрыя назвала ўмову для зняцця вета на €50 мільярдаў для дапамогі Украіне
Будапешт па-ранейшаму выступае супраць чатырохгадовага плана дапамогі.
Палітычны дарадца Віктара Орбана заявіў, што Венгрыя можа зняць вета з пакета дапамогі Украіне ў €50 млрд, калі ЕC выдзеліць прыпыненае летась фінансаванне Будапешту, піша РБК.
Венгрыя гатовая зняць вета на чатырохгадовы пакет падтрымкі Украіны ў €50 млрд, прапанаваныя Еўракамісіяй, калі ЕС размарозіць сродкі падтрымкі Будапешта (каля €30 млрд), заявіў галоўны палітычны дарадца венгерскага прэм'ер-міністра Віктара Орбана Балаш Орбан. Балаш Орбан не мае роднасных сувязяў з прэм'ерам.
«Фінансаванне Венгрыі з боку ЕС і фінансаванне Украіны — гэта два асобныя пытанні, — сказаў ён. — Але калі ЕС настойвае на тым, што фінансаванне Украіны павінна ажыццяўляцца са змененага бюджэту ЕС, тады гэтыя два пытанні становяцца ўзаемазлучанымі».
У той жа час Будапешт па-ранейшаму выступае супраць чатырохгадовага плана дапамогі Украіне і палічыў за лепшае б, каб ЕС прапанаваў Кіеву фінансаванне на адзін год без змен у бюджэце, адзначыў Балаш Орбан, дадаўшы, што Венгрыя «разгледзіць магчымасць унясення ўкладу» ў гэты пакет.
Паводле яго слоў, у рамках перамоваў аб дапамозе Украіне Венгрыя разгледзіць прапанову ЕС аб павелічэнні фінансавання аховы межаў — пастаяннае патрабаванне Будапешта — а таксама дадатковыя субсідыі ЕС, каб зрабіць эканоміку блока больш канкурэнтаздольнай.
Аднак сяброўства Украіны ў ЕС застаецца «чырвонай лініяй» для Будапешта, падкрэсліў Балаш Орбан, паколькі Венгрыя лічыць яе не адпаведнай крытэрам.
У сувязі з гэтым неабходна адкласці пачатак перамоваў аб далучэння Кіева да блоку, каб пазбегнуць «адпраўкі негатыўнага сігналу Украіне». «Адпраўка негатыўнага сігналу Украіне процілеглая таму, чаго хоча Венгрыя», — заявіў ён.
ЕС у мінулым годзе прыпыніў перадачу Венгрыі каля €30 млрд з-за праблем з вяршэнствам закона і хабарніцтвам.
Для разблакавання ўсёй сумы Будапешту трэба выканаць шэраг патрабаванняў — ад забеспячэння акадэмічнай свабоды да абароны правоў ЛГБТ-супольнасці і прадастаўлення прытулку.
Чакаецца, што ЕС да 13 снежня разблакуе €10 млрд фінансавання для Венгрыі пасля прыняцця законаў, накіраваных на незалежнасць судоў. Аднак Орбан заявіў, што Будапешт хоча атрымаць усю суму.
Цяпер чытаюць
Вучняў, якія з матам парвалі экзаменацыйныя білеты па гісторыі Беларусі, прымусілі выбачацца каля манумента Перамогі31
Каментары