«Шэсць тысяч за лекі і пункцыю плацілі не вы, а дзяржава». Беларускі, якія робяць бясплатнае ЭКА, сутыкнуліся з праблемай

З 2021 года ў беларускіх жанчын ёсць магчымасць зрабіць адно ЭКА за кошт дзяржсродкаў. Згодна з афіцыйнай статыстыкай, са студзеня па кастрычнік 2023 года ў Беларусі было выканана 1006 цыклаў экстракарпаральнага апладнення, з якіх 410 паспяхова завяршыліся цяжарнасцю.

На ўсю краіну толькі тры ўстановы аховы здароўя, куды можна звярнуцца па бясплатную спробу ЭКА (дзве з іх знаходзяцца ў сталіцы і адна ў Гомелі). Гэта Гомельскі абласны дыягнастычны медыка-генетычны цэнтр з кансультацыяй «Шлюб і сям'я», гарадскі клінічны радзільны дом №2 горада Мінска, а таксама рэспубліканскі навукова-практычны цэнтр «Маці і дзіця».

Частка жанчын пасля няўдалай першай спробы ў дзяржаўнай клініцы ідзе ў прыватную па лепшы сэрвіс. І забраць эмбрыёны ў выпадку змены ўстановы аховы здароўя вельмі лагічнае рашэнне: не трэба будзе зноў праходзіць стымуляцыю і пункцыю — а гэта значыць і аплачваць усё гэта. Але для таго ж радзільнага дома гэта страта грошай, якія можна было б зарабіць, правёўшы другую і наступныя спробы ЭКА ўжо за грошы самой сям'і.

Гэтай восенню ў мінскай гарадской радзільні № 2 вырашылі змагацца з тым, што патэнцыяльныя кліенткі сыходзяць, і сталі патрабаваць падпісаць дадатковую дамову, дзе ёсць пункт «Мы згодны з тым, што замарожаныя эмбрыёны будуць выкарыстоўвацца для наступных пераносаў толькі ва УАЗ «ГКРД № 2» і не падлягаюць транспарціроўцы ў іншыя арганізацыі» (гэта тычыцца толькі тых, хто прыходзіць менавіта па бясплатную спробу ЭКА, астатніх на словах спрабуюць угаварыць).

Павялічыць

Жанчыны мяркуюць, што звязана гэта і з тым фактам, што ў жніўні дзве доктаркі, якія праводзілі ЭКА, сышлі працаваць у прыватную клініку — частка кліентак вырашылі, што хочуць працягваць працаваць з імі і замовілі транспарціроўку сваіх эмбрыёнаў у тую самую клініку.

Як піша адна з жанчын, ёй растлумачылі новаўвядзенне, якое перашкаджае распараджацца сваімі эмбрыёнамі, так:

«Шэсць тысяч за лекі і пункцыю плацілі не вы, а дзяржава».

Шмат у каго навіна выклікала абурэнне — бо эмбрыёны атрыманы з біялагічнага матэрыялу жонкі і мужа, чаму тады нехта іншы вырашае, што з імі павінна адбывацца? Да таго ж, замарозку і захоўванне эмбрыёнаў сям'я таксама аплачвае самастойна. Напрыклад, каб зрабіць крыякансервацыю 1-2 эмбрыёнаў на паўгода, трэба аддаць каля 275 рублёў.

У суполцы будучых мам сумна жартуюць, што наступным крокам будзе тое, што ў ваенным білеце хлопцам пачнуць адзнаку рабіць, што дзяржава аплаціла ЭКА. «І будзе хлопчык служыць не 18 месяцаў, а 36. Адпрацоўка!». 

Нехта мяркуе, што ў хуткім часе дзяржава пачне прапаноўваць парам выкупляць свае ж эмбрыёны, каб кампенсаваць выдаткі на бясплатнае ЭКА.

Але ёсць і тыя, хто знаходзіць сітуацыю цалкам нармальнай:

«За атрыманне эмбрыёнаў плаціла дзяржава, а потым вы проста іх перавозіце і ўсё. Атрымліваецца для 2-й радзільні ніякага заробку, адны страты».

Чытачка «Нашай Нівы» звярнулася ў радзільню № 2 і спытала, ці сапраўды нельга будзе транспартаваць эмбрыёны ў іншую клініку, калі зробіш першую бясплатную спробу ЭКА ў іх.

Адказ быў лаканічны:

«Эмбрыёны не будуць падлягаць транспарціроўцы».

 Чытайце таксама:

«Я павінна рабіць гэта бясплатна? Не, адназначна». Сурагатная маці пра жыццё, хэйт і стэрэатыпы

Выраб яйцаклетак са звычайных клетак цела можа цалкам змяніць наша ўяўленне пра бацькоўства

«Праз трывожнасць набрала 30 кілаграмаў». Чаму некаторыя жанчыны панічна баяцца нараджаць і што з гэтым рабіць

• 7
• 0
• 0
• 8
• 1
• 5
• 22
• 0