У Маскве на тэрыторыі штаб-кватэры Службы замежнай разведкі Расіі паставілі помнік кіраўніку ВЧК Феліксу Дзяржынскаму, паведаміла ТАСС.
На цырымоніі адкрыцця помніка прысутнічаў дырэктар СЗР Сяргей Нарышкін. Ён заявіў, што Дзяржынскі, маўляў, «марыў стварыць будучыню, заснаваную на прынцыпах дабра і справядлівасці».
Фелікс Дзяржынскі пасля бальшавіцкай рэвалюцыі 1917 года ўзначальваў Усерасійскую надзвычайную камісію (ВЧК), якая ў гады Грамадзянскай вайны здзяйсняла тэрор у дачыненні да людзей, абвінавачаных у датычнасці да «контррэвалюцыйных» арганізацый.
Помнік Дзяржынскаму ў Маскве паставілі каля будынка КДБ на Лубянцы ў 1958 годзе. У 1991 годзе пасля правалу спробы дзяржаўнага перавароту ГКЧП яго дэмантавалі, і гэта дзеянне набыло сімвалічны характар. Але сам помнік не быў разбураны і цяпер знаходзіцца ў маскоўскім парку «Музеон». Каля будынка СЗР цяпер паставілі ягоную паменшаную копію.
У лютым 2021 года ў Маскве арганізавалі галасаванне па пытанні, ці варта зноў паставіць помнік на Лубянскай плошчы. Жыхары горада павінны былі выбраць паміж скульптурамі Фелікса Дзяржынскага і князя Аляксандра Неўскага. Гэта выклікала спрэчкі і дыскусію ў грамадстве, а меркаванні тых, хто галасаваў, падзяліліся практычна пароўну. Гэта прывяло да таго, што мэр Масквы Сяргей Сабянін абвясціў аб датэрміновым спыненні галасавання, заявіўшы, што «помнікі павінны не расколваць, а аб'ядноўваць грамадства». Лубянскую плошчу кіраўнік горада ў выніку прапанаваў пакінуць «як ёсць».
Ціханоўскі расказаў, што трэба было рабіць у жніўні 2020-га62
Каментары