Міністэрства сельскай і лясной гаспадаркі Фінляндыі рыхтуе ўказ аб рэестры катоў, які мусіць уступіць у сілу ў пачатку 2026 года. Задуманы рэестр мае стаць аналагічным уведзенаму нядаўна рэестру сабак: жывёлы чыпіруюцца, і інфармацыя пра іх заносіцца ў спецыяльны каталог.
Ідэя скіраваная на садзейнічанне больш адказнаму ўтрыманню катоў, спрашчэнне іх ідэнтыфікацыі і прадухіленне пашырэння папуляцыі паўдзікіх жывёл, піша Yle.fi.
Па словах эксперта фінскага Мінсельгаса Ансі Велінга, катоў кідаюць часцей, чым сабак.
Згодна з данымі Асацыяцыі абароны жывёл SEY, у Фінляндыі цяпер налічваецца каля 20 000 бяздомных катоў. І калі палова з іх трапляе ў прытулкі, то каля 10 000 — гэта паўдзікія жывёлы, якія жывуць зграямі.
Калі такія жывёлы не кастрыраваны і не стэрылізаваны, то ў выніку іх размнажэння з'яўляюцца каты, за якіх увогуле ніхто не адказвае.
Цяпер ніхто не ведае, колькі насамрэч катоў у Фінляндыі. Паводле афіцыйнай статыстыкі, іх крыху менш за 600 000, але рэальна можа быць і больш за мільён. Дзеля таго і патрэбны задуманы рэестр.
Нагляд над выкананнем новага ўказа будзе рабіць Фінляндскае агенцтва харчавання (Ruokavirasto). Калі кот не будзе зарэгістраваны пасля змены закона, то да ўладальніка могуць быць ужытыя санкцыі, напрыклад, штрафы.
Цяпер чытаюць
Музыка, маляванне і танцы ў школах і гімназіях — усё? Што вядома пра скарачэнні настаўнікаў-эстэтыстаў5
Музыка, маляванне і танцы ў школах і гімназіях — усё? Што вядома пра скарачэнні настаўнікаў-эстэтыстаў
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары