«Шахцёр» падаў апеляцыю на рашэнне AБФФ па справе аб дамоўных матчах
Футбольным клубам «Шахцёр» пададзена апеляцыя на рашэнне камітэта кантрольна-дысцыплінарнага і па этычных пытаннях АБФФ ад 10 мая 2023 года. Гэтым рашэннем клуб быў пазбаўлены золата чэмпіянату-2022, 50 ачкоў у цяперашнім і наступным сезонах, а таксама аштрафаваны на 370 000 рублёў.
У апеляцыі звяртаецца ўвага, што прадстаўнікі клуба не мелі магчымасці азнаёміцца з матэрыяламі справы і заявіць пісьмовую пазіцыю па справе, каб прадставіць доказы і тлумачэнні.
Клуб таксама лічыць, што яго віна ва ўчыненні названых парушэнняў не пацверджана адпаведнымі доказамі.
У апеляцыі адзначаецца, што «пры прызначэнні пакаранняў […] ККД кіраваўся нормамі дысцыплінарнага кодэкса з улікам змен, прынятых выканкамам АБФФ 6 сакавіка 2023 года […], што супярэчыць арт. 103 дысцыплінарнага кодэкса, бо названыя ў рашэнні матчы былі праведзены ў 2022 годзе».
Яшчэ адзін довад клуба — тое, што «дысцыплінарны кодэкс не прадугледжвае магчымасці пазбаўлення большай колькасці ачкоў, чым было атрымана клубам на дату прыняцця рашэння, і адначасовага пазбаўлення турнірных ачкоў у бягучым і ў будучым спаборніцтвах».
«На думку клуба, пакаранне ў выглядзе дыскваліфікацыі на 12 месяцаў гульца [Мікіты Корзуна], які якога-небудзь удзелу ні ў дамоўных матчах, ні ў неправамерным фінансавым стымуляванні, згодна з інфармацыяй, выкладзенай у рашэнні ККД, не браў, не адпавядае […] прынцыпам разумнасці і справядлівасці», — таксама гаворыцца ў апеляцыі.
Цяпер чытаюць
Віталь з-пад Вілейкі, які падпаліў хату з уласнымі дзецьмі, завербаваўся ў расійскае войска. І прапаў на першым жа баявым заданні3
Каментары